AShM kóp eskertý jasaı bermeı, naqty sharalardy qolǵa alýy qajet - Premer-mınıstr
"Mynaý vaktsına týraly aıtyp jatyrsyzdar. Kóp problema sodan shyǵyp otyr ǵoı. Negizinen, ony xalyqaralyq talaptarǵa saı keltirý kerek. Eger ol bolmaıtyn bolsa, onda reglament qajet shyǵar. Jańa Aıtýǵanov (aýyl sharýashylyǵy vıtse-mınıstri - avt.) aıtyp ótti, mine, eskertý jasaımyz dep, ne ol "eskertemiz" degen? Onyń bári - "dejýrnyı" sózder. Siz eskertesiz de, qoıasyz. Olar bolsa, óz isterin jalǵastyra beredi. Sózdi qaıtesiz, naqty jumys kerek, Asqar Isabekuly (aýyl sharýashylyǵy mınıstri - avt.). Olardy úıtip saýsaqpen qorqytyp, kelesi joly qurtamyz, úıtemiz-búıtemiz degenshe, qajetti qujattardyń barlyǵyn bolyp, zańdy túrde jumys júrgizý kerek. Tıimsiz vaktsına bolsa, kim aldy, sony tártipke shaqyrý qajet. Jańa aıtyp otyrsyzdar ǵoı, qajetti quzyrly organdarǵa materıal berip jatyrmyz dep. Árıne, úlken sharýa bul. Qalǵan bes oblys boıynsha Sibir jarasynan shyǵýymyz qajet", - dep atap kórsetti B.Saǵyntaev.
Osy oraıda Premer-mınıstr kórshi elderdiń Qazaqstannyń etine qatysty veterınarlyq tekseristi kúsheıtip jatqanyn taǵy bir márte eske salyp, kelesi jylda keleńsiz jaǵdaılar qaıtalanbaýy qajet dep túıindedi.
Aıta keteıik, Úkimettiń búgingi otyrysynda QR Aýyl sharýashylyǵy vıtse-mınıstri Qaırat Aıtýǵanov sibir jarasyna qarsy vaktsınaǵa synaq júrgizgennen keıin quqyq qorǵaý organdaryna tıisti materıaldardyń jiberilgenin jetkizdi. "Bıyl tamyz aıynda sibir jarasyna vanktsınalardyń sapasyn tekserý maqsatynda biz tıisti synamalardy Ýkraına men Efıopııanyń zertxanalaryna jibergen edik. Sonyń nátıjesi qýantarlyq emes. Qazan aıynda tıisti materıaldar quqyq qorǵaý organdaryna jiberildi. Qazirgi kezde sol materıaldar boıynsha tergeý amaldary júrip jatyr", - deıdi ol.
Osyǵan baılanysty vıtse-mınıstr kelesi jyldan bastap talaptardyń kúsheıtiletinin eskertti.