AShM: Konservilengen jemis-kókónis ónimderiniń 90 paıyzdan astamy – ımport

ASTANA. KAZINFORM – Elimizde halyq tutynatyn konservilengen jemis-kókónis ónimderiniń 90 paıyzdan astamy – ımport. Bul týraly Kazinform agenttiginiń resmı saýalyna Aýyl sharýashylyǵy mınıstrligi joldaǵan resmı jaýapta aıtylǵan.

— Konservilengen jáne qaıta óńdelgen jemis-kókónis ónimderiniń óndirisi 2024 jyldyń qorytyndysy boıynsha 29 myń tonna boldy. Sonymen qatar, ımport úlesi aıtarlyqtaı joǵary – 198 myń tonna bolyp keledi. Ol jalpy tutynýǵa shaqqanda 90 paıyzdan asady. Importtyq ónimniń úlesi joǵary bolýynyń sebebi - otandyq jemis-kókónis shıkizatynyń jetkizilimi maýsymdyq bolýy jáne óndirilgen konserviler men shyryndardyń ózindik quny joǵary bolýy, - dep jazylǵan jaýapta.

Vedomstvo elimizde bul salany qoldaý baǵytynda birqatar is-shara atqarylyp jatqanyn málim etti.

— Jemis-kókónis shıkizatynyń óndirisin arttyrý maqsatynda elimizde baý-baqsha sharýashylyǵyn qoldaý sharalary iske asyrylyp jatyr. Máselen, baý -baqsha salý úshin ınvestıtsııalyq sýbsıdııalar kózdelgen. Odan bólek, maýsymǵa táýeldilik máselesin sheshý úshin jemis-kókónis qoımalaryn salý jónindegi is-sharalar kesheni bekitilgen. Sonymen qatar jemis-kókónisterdi qaıta óńdeý kásiporyndaryn qoldaý maqsatynda jeńildetingen nesıeler, sondaı-aq ınvestıtsııalyq sýbsıdııalar baǵdarlamalary qarastyrylǵan, - delingen habarlamada.