AShM komıteti jarqanattardyń uıasyna qatysty pikir bildirdi

ASTANA. QazAqparat - QR AShM Orman sharýashylyǵy jáne janýarlar dúnıesi komıteti el arasynda taraǵan jarqanattar týraly alyp-qashpa habarlarǵa pikir bildirdi, dep habarlaıdy QazAqparat.

«Sońǵy ýaqytta áleýmettik jeli men BAQ-ta jarqanattyń uıasyn qymbatqa satyp alatyny jóninde jazbalar paıda boldy. Arnaıy túsindirip ótkimiz keledi, jarqanattar eshqashan uıa salmaıdy, olar úńgirler men uńǵymalardy, jertóle, aǵash qýysy men qudyqtardy panalaıdy», - dep jazdy komıtettiń baspasóz hatshysy Sáken Dildahmet Feısbýktegi paraqshasynda.

Jarqanattar nemese qolqanattylar - ushýdy meńgergen jalǵyz sútqorektiler. Túrler sany boıynsha kemirgishterden keıin ekinshi orynda tur.

«Qazaqstanda jarqanattyń 27 túri mekendeıdi. Olardyń beseýi Qazaqstannyń Qyzyl kitabyna engen (Ikonnıkov jaraqanaty, Azııalyq jalpaqqulaq, Bobrınskıı jarqanaty, aqbaýyr jarqanat, keńqulaqty jarqanat). Olardyń árbirine keltirilgen zaalal úshin 100 AEK-ten 200 AEK-ke deıin (252 myń teńgeden 505 myń teńgege deıin) aıyppuldar qarastyrylǵan», - dedi S. Dildahmet.

Bir orynda jarqanattardyń birneshe túri tirshilik ete alady. Sany jaǵynan bir orynda myńnan astam jarqanat bolýy múmkin.

Máselen, Ortalyq Azııadaǵy Baharden úńgirinde 40 myńnan astam jarqanat bar. Qazaqstanda da jarqanattar mekendeıtin aýqymdy oryndar bar. Jarqanattar jyl maýsymyna qaraı, úńgirlerdi aýystyryp otyrady.

Sonymen birge, komıtet ókili qazaqstandyqtarǵa jalǵan aqparat taratpaýǵa keńes berdi.

«Jarqanattyń uıasy týraly jalǵan aqparat taratýdan saq bolyńyz! QR Qylmystyq Kodeksiniń 274-babynda jalǵan aqparat taratqandarǵa jaza belgilengen», - dep jazdy S. Dildahmet.