AShM Qyzylordada sýbsıdııa nege berilmeı otyrǵanyn túsindirdi
QYZYLORDA. KAZINFORM — Buǵan deıin Qyzylorda oblysynda fermerler mal basyn kóbeıtýge baǵyttalǵan memleket qoldaýynyń toqtap qalǵanyna shaǵym bildirgen edi. Kazinform tilshisi sýbsıdııadan qaǵylǵan sharýalardyń janaıqaıyn Aýyl sharýashylyǵy mınıstrligi men Qyzylorda oblystyq aýyl sharýashylyǵy basqarmasyna jetkizip, resmı jaýapqa júgindi.
Mınıstrlik málimdegendeı, 2023 jyldan bastap agroónerkásiptik keshen sýbektilerin nesıeleý, sondaı-aq aýyl sharýashylyǵy janýarlaryn, tehnıka men tehnologııalyq jabdyqtardy satyp alýǵa lızıng berý boıynsha syıaqy mólsherlemelerin sýbsıdııalaý baǵdarlamasy jergilikti bıýdjet bazasyna berildi. Bıýdjet zańnamasyna sáıkes ol birinshi kezekte jergilikti bıýdjet qarajaty esebinen qarjylandyrylýy tıis.
— 2026-2028 jyldarǵa arnalǵan jalpy sıpattaǵy transfertterdi bekitý týraly zańǵa sáıkes Qyzylorda oblysynyń jergilikti bıýdjetine barlyq sýbsıdııalaý baǵdarlamasy boıynsha qarajat kelesi kólemde berildi: 2026 jyly — 17,4 mlrd teńge, 2027 jyly — 20,4 mlrd teńge, 2028 jyly — 19,6 mlrd teńge. Sonymen qatar Aýyl sharýashylyǵy mınıstriniń 2025 jylǵy 2 qazandaǵy № 349 buıryǵymen sýbsıdııalaý qaǵıdalaryna ózgeris endi. Onyń ishinde jumys organynyń (qyzmet kórsetýshiniń) osy baǵdarlamaǵa qarajat kózdelmegen kezde sýbsıdııalaý týraly usynystardy rezervke (kútý paraǵyna) qabyldaýdy alyp tastaý bóliginde. Bul rette ózgerister kúshine engenge deıin rezervke (kútý paraǵyna) túsken sýbsıdııalaý týraly barlyq usynys saqtaldy jáne bıýdjettik qarajat túsken saıyn oryndalady. Sonymen qatar jumys organy (qyzmet kórsetýshi) ózgerister kúshine engenge deıin qarastyrmaǵan barlyq sýbsıdııalaý týraly usynystar da qarastyrýǵa jatady, — delingen vedomstvo habarlamasynda.
Syıaqy mólsherlemesin sýbsıdııalaý baǵdarlamasyn iske asyrý barysynda kezdesip otyrǵan másele barlyq óńirge tán. 2016-2025 jyldar aralyǵynda Qyzylorda oblysy boıynsha 3471 qaryz sharty negizinde 2662 sharýashylyqqa 20,6 mlrd teńge sýbsıdııa tólendi.
— Osy ýaqytqa deıin qaryz sharttary boıynsha usynystar rezervke túspeı, qabyldanyp keldi. Bıyl atalǵan bıýdjettik baǵdarlama boıynsha oblystyq bıýdjetten 2,2 mlrd teńge bólinip, tolyq ıgerildi. Sonymen qatar oblystyq máslıhattyń 2026 jylǵy 15 mamyrdaǵy № 247 sheshimimen qosymsha 1 mlrd teńge bólindi. Bólingen qarjy buryn qabyldanǵan mindettemelerge ǵana jetkilikti. Qabyldanǵan mindettemelerden artyq qarjynyń bolmaýyna baılanysty qaǵıda talaptaryna sáıkes jańa usynystardy qabyldaý toqtap tur. Baǵdarlamaǵa qosymsha qarjy bólý bıýdjettiń múmkindigine qaraı sheshiledi. Atalǵan másele boıynsha sharýashylyqtar arasynda qarjy ınstıtýttarymen birlesken túsindirme jumystary júrgizilip keledi jáne bul oblys ákimdiginiń baqylaýynda, — delingen basqarma habarlamasynda.
Eske salaıyq, syrboıylyq fermerler byltyr «Agrobıznes» baǵdarlamasy aıasynda «Agrarlyq nesıe korporatsııasy» AQ qarajaty esebinen nesıe seriktestikteri arqyly 25,5 paıyzben, ıaǵnı baǵdarlama talabyna sáıkes nesıe mólsherlemesi syıaqysynyń 6 paıyzyn sharýashylyq tólep, qalǵan syıaqysy bóligin memleket sýbsıdııalaıtynyn eskerip, tórt túlik basyn kóbeıtý úshin nesıe rásimdegen. Alaıda, sýbsıdııalaıtyn qarajattyń bolmaýyna baılanysty sol nesıeni tórt-bes aıdan beri ózderi tólep keledi.
