AShM: Qazaqstanda iri qara sany – 8,8 mln, qoı – 21,5 mln, jylqy 4,7 mln basqa jetti

ASTANA. KAZINFORM – Qazaqstanda 2025 jyldyń alǵashqy alty aıynyń qorytyndysy boıynsha barlyq túrdegi aýyl sharýashylyǵy maldarynyń basy turaqty ósip otyr. Bul týraly Aýyl sharýashylyǵy mınıstrligi málim etti.

Vedomstvo dereginshe, iri qara mal sany 8,8 mln basqa jetip, 8,3%-ǵa artty. Sonyń ishinde sıyr – 4,5 mln bas (+16,3%). 2,7 mln buzaý alyndy, bul ótken jylmen salystyrǵanda 17,5%-ǵa kóp.

Usaq mal basy 0,8%-ǵa ósip, 21,5 mln basty qurady. 7,6 mln qozy alyndy (+4,8%).

Jylqy sany 4,7%-ǵa kóbeıip, 4,7 mln basqa jetti, 1 mln qulyn alyndy (+8,1%).

Qańtar–maýsym aılarynda 529,9 myń tonna et óndirildi (+1,5%), onyń ishinde sıyr eti – 182,3 myń tonna, qoı eti – 56,4 myń tonna, jylqy eti – 69,3 myń tonna.

Aýyl sharýashylyǵy mınıstrliginiń aqparatyna sáıkes, et ónimderi baǵasynyń ósýi ishki jáne syrtqy obektıvti faktorlarǵa baılanysty: kommýnaldyq qyzmetter, energııa resýrstary, jem-shóp pen janar-jaǵarmaıdyń qymbattaýy, sondaı-aq joǵary eksporttyq suranys.

- Іshki naryqty qorǵaý úshin tiri maldy áketýge ýaqytsha shekteýler engizilip, et ónimderin eksporttaýǵa baqylaý kúsheıtildi. 10 qazanǵa deıin iri qara men usaq maldyń analyq basyn áketýge tyıym salynǵan. 15 mamyrdan 15 tamyzǵa deıin iri qara buqalaryn áketýge tyıym engizilip, bul shekteý 16 tamyzdan 30 qazanǵa deıin uzartylatyn bolady, - delingen aqparatta.

Qańtar–mamyr aralyǵynda sıyr eti eksporty 12,3 myń tonnany qurap, ótken jyldyń sáıkes kezeńimen salystyrǵanda 2,4 ese ósti. Qoı eti eksporty – 9,2 myń tonna (+2,6 ese).

Elde qýattylyǵy 534 myń basqa deıingi 300 iri qara bordaqylaý alańy jáne 15 usaq mal alańy jumys isteıdi. Tolyq júktelmeý sebepteri – jas maldy satyp alýǵa qoljetimdi aınalym qarajatynyń tapshylyǵy jáne banktik nesıeniń qymbattyǵy.

Osyǵan baılanysty Úkimet 5% mólsherlememen jeńildetilgen nesıe berý baǵdarlamasyn iske qosty. 30 shildeden bastap bordaqylaý alańdaryna jas mal, jem-shóp jáne janar-jaǵarmaı satyp alý úshin ótinim qabyldanýda. Bul maqsatqa 50 mlrd teńge bólinip, alańdardyń júktemesin 34%-dan 60%-dan astamǵa arttyrý josparlanǵan.

Aldaǵy ýaqytta asyl tuqymdy mal satyp alý jáne tuqymdyq sapany jaqsartý úshin jyldyq 6% mólsherlememen «Іgilik» jańa baǵdarlamasy iske qosylady.

Bul sharalar óndiristi arttyrýǵa, baǵany turaqtandyrýǵa jáne halyqty sapaly et ónimderimen qamtamasyz etýge baǵyttalǵan.

Aıta keteıik, maýsym aıynda elimizde mal basyn kóbeıtý jáne et óndirisin damytýǵa qatysty josparlar týraly da habarlanǵan bolatyn.