AShM: Qara tizimge 600-den astam jerdi tıimsiz paıdalanýshy engizildi
QR AShM alqa otyrysynda Jer resýrstaryn basqarý komıtetiniń tóraıymy Gúljahan Bımendına atalmysh tizimniń ashyq túrde qoljetimdi ekenin aıtty.
«Ózderińizge belgili, 2015 jyldan bastap aýyl sharýashylyǵy jerin tıimdi paıdalanýdy baqylaý ákimdikterdiń quzyryna kiredi. Bul rette, jergilikti atqarýshy organdardyń paıdalanylmaıtyn jerlerdi anyqtaý boıynsha jumysy AShM-nyń turaqty baqylaýynda. Jergilikti atqarýshy organdardyń jumysyn taldaý negizinde AShM jerlerdi aýyl sharýashylyǵy aınalymyna nemese memleket menshigine qaıtarýdy kúsheıtýge baǵyttalǵan zańnamalyq sharalardy jetildiredi. Jalpy, sońǵy 2 jylda biz respýblıka boıynsha aýyl sharýashylyǵy jerlerin anyqtaý men qaıtaryp alýdyń oń dınamıkasyn baıqap otyrmyz», - dedi G.Bımendına.
Sondaı-aq, komıtet basshysy AShM sot sheshimi boıynsha jer ýchaskeleri qaıtarylyp alynǵan tulǵalardyń tizimin qalyptastyrýdy jalǵastyryp jatqanyn atap ótti.
Búginde «qara tizimde» 600-den astam adamnyń aty-jóni, jer ýchaskesiniń kadastrlyq nómiri, aýdany jáne naqty ornalasqan jeri kórsetilgen. Aqparat https://qoldau.kz/kz saıttynda berilgen.