AShM ıtbalyqtardyń qyrylý sebebin jarııalady
AQTAÝ. KAZINFORM – 2022–2024 jyldary Mańǵystaýda Kaspıı teńiziniń jaǵalaýynan tabylǵan ıtbalyqtardyń qyrylý sebepteri – sozylmaly ýlaný, jyrtqyshtar obasy, jedel pnevmonııa jáne teńiz túbinen bólingen tabıǵı gaz saldarynan tunshyǵý. Bul týraly QR Aýyl sharýashylyǵy mınıstrligi habarlady.
Itbalyqtardyń ómir súrýine qaýip tóndiretin basty faktorlar – qolaısyz klımattyq jaǵdaılar, ásirese Kaspıı teńizi deńgeıiniń tómendeýi. Sonymen qatar qystyń qysqarýy men jalpy jylyný, qysqy ýaqytta keme qatynasynyń artýy, balyq aýlaý torlaryna túsýi jáne ózge de antropogendik faktorlar ıtbalyqtardyń muz ústinde kóbeıip-ónýine teris áser etip jatyr.
– Itbalyqtar sanynyń azaıýyna - janýarlar ımmýnıtetiniń tómendeýi men túrli aýrýlarǵa, sonyń ishinde sozylmaly ýlaný men jyrtqyshtar obasyna beıimdiligi áser etti. Ǵylymı uıymdar men quzyrly memlekettik organdardyń ókilderinen quralǵan top 2022 jyldyń kúzi men 2023 jyldyń kókteminde tabylǵan Kaspıı ıtbalyqtarynyń qyrylýyna basty sebep – ımmýnıtettiń álsireýinen týyndaǵan juqpaly aýrýlarǵa beıimdilik aıasynda damyǵan jyrtqyshtar obasy men jedel pnevmonııa degen qorytyndyǵa keldi, - delingen habarlamada.
Al, 2024 jyldyń kúzinde qyrylǵan ıtbalyqtardyń kóbi qatty ydyraý satysynda bolǵandyqtan, sapaly patologııalyq materıal alý múmkin bolmaǵan. Biraq, keıbiriniń azý tisteri, jún, tyrnaqtaryna zerthanalyq saraptama jasalǵan.
– Ǵylymı uıymdar ókilderiniń pikirinshe, 2024 jyly tabylǵan ıtbalyqtardyń jappaı qyrylýyna yqtımal sebepter - qustar tumaýynyń joǵary patogendi vırýsy, ımmýnıtet tapshylyǵy aıasynda damyǵan neıroınfektsııalyq aýrýlar jáne teńiz túbinen bólingen tabıǵı gazdan paıda bolǵan, dem alýǵa jaramsyz aýa qabatynyń áserinen bolǵan tunshyǵý, - delingen mınıstrlik taratqan málimette.
Aıta ketetin jáıt, XX ǵasyrdyń basynda Kaspıı ıtbalyǵynyń sany - 1 mıllıondaı bolǵan. Ókinishke oraı, búginde ol 70–90 paıyzǵa azaıyp ketti.
Buǵan deıin, Mańǵystaýda teńiz jaǵalaýynan 279 ıtbalyqtyń óleksesi tabylǵany týraly jazǵan bolatynbyz.