AShM ınspektorlary 92 mln teńgeniń 1,5 myńnan astam buzýshylyqtaryn anyqtady
Fıtosanıtarııalyq baqylaý júrgizý barysynda ósimdikter karantıni salasynda 1 723 buzýshylyq anyqtaldy, dep habarlaıdy QazAqparat QR Aýyl sharýashylyǵy mınıstrliginiń bapasóz qyzmetine silteme jasap.
Onyń ishinde eń kóp taralǵandary - ónimdi fıtosanıtarııalyq sertıfıkatsyz alyp júrý. Sonymen qatar, qaptamada tańbalaýdyń bolmaýy, fıtosanıtarlyq sertıfıkat talaptaryna sáıkes kelmeý jáne fıtosanıtarlyq talaptardyń buzylýy faktileri tirkelgen. 150 jaǵdaıda karantındik nysandar anyqtalǵan.
403 jaǵdaıda karantınge jatqyzylǵan ónim eksporttaýshy elge qaıtaryldy, taǵy 8-i joıyldy.
Sonymen qatar, 1 406 jeke jáne zańdy tulǵalar ákimshilik jaýapqa tartylyp, 92 401 241,0 teńge kóleminde aıyppul salyndy.
Ázerbaıjan elinen jetkizilgen qyzanaq jemisterine karantındik fıtosanıtarııalyq baqylaý júrgizý kezinde 17 jaǵdaıda Tomato brown rugose cfruit virus (ToBRFV) vırýsy anyqtaldy. Osyǵan baılanysty Komıtet tarapynan Ázerbaıjan aýmaǵynan qyzanaq jemisterin ákelýge shekteý túrinde ýaqytsha karantındik fıtosanıtarııalyq shara engizildi.
Zańnamalardy basshylyqqa ala otyryp jáne Ázerbaıjan respýblıkasynyń Azyq-túlik qaýipsizdigi jónindegi agenttiginen kelip túsken karantınge jatqyzylǵan ónimdi Qazaqstan Respýblıkasynyń aýmaǵyna ákelýdiń aldyn alý boıynsha qabyldanǵan jáne qabyldanatyn sharalar týraly aqparaty nazarǵa alynyp, 2021 jylǵy 21 qańtardan bastap osy shekteý alynyp tastaldy.
Sondaı-aq, jyl basynan beri Túrikmenstannyń ósimdikter karantıni jónindegi memlekettik qyzmetiniń fıtosanıtarııalyq sertıfıkattarynyń súıemeldeýimen Qazaqstanǵa jetkiziletin qyzanaqtarǵa karantındik fıtosanıtarııalyq baqylaý júrgizý kezinde «qońyr ájim» vırýsynyń (Tomato brown rugose fruit virus (ToBRFV) 19 deregi anyqtalǵan.
Karantındik obektilerdiń júıeli túrde anyqtalýyna jáne EAEO biryńǵaı karantındik fıtosanıtarııalyq talaptarynyń buzylýyna baılanysty, QR AShM agroónerkásip kesheni memlekettik ınspektsııa komıteti 2021 jyldyń 7-maýsymynan bastap Túrkmenstan aýmaǵynan qyzanaq pen burysh ónimderin ákelýge tyıym salý túrinde ýaqytsha karantındik fıtosanıtarııalyq sharalardy engizdi.