AShM-ǵa 2 aıda mal sharýashylyǵyn damytýdyń keshendi josparyn ázirleý tapsyryldy
ASTANA. KAZINFORM – QR Premer-mınıstri Oljas Bektenov QR Aýyl sharýashylyǵy mınıstrligine 2 aı ishinde mal sharýashylyǵyn damytýdyń keshendi josparyn ázirleýdi, 1 aı ishinde jer resýrstaryn ádil bólýge baǵyttalǵan tıisti zańnamalyq bastamalardy ázirlep, usynýdy tapsyrdy.
— Aýyl sharýashylyǵy mınıstrligine eki aı merzim ishinde qarjylandyrý kózderi men ınvestıtsııalyq jobalardyń tizbesin naqtylaı otyryp, Mal sharýashylyǵyn damytýdyń keshendi josparyn ázirleýdi tapsyramyn. Osy jumystyń sheńberinde veterınarııalyq jáne fıtosanıtarııalyq standarttardy da jetildirýdi qamtamasyz etý qajet. Memleket basshysy logıstıka ortalyqtaryn, agrohabtar men jetkizýdiń birtutas jelisimen qosa, agrarlyq ınfraqurylymdy damytý qajettigin erekshe atap ótti. Bul rette tsıfrlyq tehnologııalardy barynsha engizip, otandyq ǵylymı ázirlemelerdiń áleýetin paıdalaný kere, — dedi ol Úkimet otyrysynda.
Sondaı-aq Bektenov elimizde jer resýrstaryn ádil bólýdi júzege asyratyn tetikterdi ázirleýdi tapsyrdy.
— Jer resýrstaryna keletin bolsaq, olardy utymdy ári tıimdi paıdalaný, ádil bólýdi qamtamasyz etý boıynsha sharalardy kúsheıtken jón. Barlyq protsester ashyq júrip, nátıjesi boıynsha esep berilýi kerek. Bul, árıne, tsıfrlyq quraldardy paıdalana otyryp júzege asýǵa tıis. Aýyl sharýashylyǵy mınıstrligine bir aı merzimde osy tetikterdi iske asyrýǵa baǵyttalǵan tıisti zańnamalyq bastamalardy ázirlep, engizýdi tapsyramyn, — dedi Úkimet basshysy.
Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.