AShM: el boıynsha 1,7 mln gektar alqap shegirtkege qarsy óńdeldi
ASTANA. KAZINFORM — Óńirlerde shegirtke zııankesterine qarsy hımııalyq óńdeý jumystary jalǵasyp jatyr. 9 shildedegi jaǵdaı boıynsha boljanǵan 2,2 mln gektar alqaptyń 1,7 mln gektary nemese 76,2%-y óńdeldi, dep habarlaıdy Aýyl sharýashylyǵy mınıstrliginiń baspasóz qyzmeti.
Egis alqaptaryn qorǵaý jumystary josparǵa sáıkes júrgizilip jatyr. Barlyq qajetti is-sharalar ýaqtyly ári tolyq kólemde oryndalyp keledi.
Shegirtke zııankesterine qarsy júrgizilip jatqan qorǵanys is-sharalarynyń oryndalýyn baqylaý maqsatynda qazirgi ýaqytta Agroónerkásiptik keshendegi memlekettik ınspektsııa komıtetiniń basshylyǵy Qaraǵandy, Almaty jáne Jetisý oblystarynda jumys istep jatyr. Aýmaqtyq ınspektsııalardyń basshylarymen birlesip óńdeý júrgizilgen alqaptarǵa tekserý júrgizildi.
— Bıyl 2,2 mln gektar alqapqa hımııalyq óńdeý júrgizý josparlanǵan. Bul 2024 jylmen salystyrǵanda 30%-ǵa az. Mundaı nátıjege Úkimettiń qoldaýymen júzege asyrylǵan keshendi jumystardyń jáne ósimdikterdi qorǵaý júıesin jetildirý baǵytynda qabyldanǵan sharalardyń arqasynda qol jetkizildi. Atap aıtqanda, qyzmetterdi satyp alýdyń biryńǵaı júıesi engizilip, satyp alý úderisterin ortalyqtandyrýǵa jáne bıýdjet qarajatynyń tıimdi paıdalanylýyn arttyrýǵa múmkindik berdi, — delingen vedomstvo taratqan aqparatta.
Jeldetkish búrikkishterdiń táýliktik ónimdilik normalary qaıta qaralyp, bir tehnıkanyń óńdeý kólemi 100 gektardan 70 gektarǵa deıin tómendetildi. Sonyń nátıjesinde jumyldyrylǵan tehnıka sany 556 birlikke jetip, 2025 jylmen salystyrǵanda 25%-ǵa artty.
Sonymen qatar, fıtosanıtarııalyq qyzmettiń tehnıkalyq parki jańartylyp, 103 ushqyshsyz ushý apparaty satyp alyndy. Onyń ishinde 57-si fıtosanıtarııalyq zerttep-qaraý jumystaryn júrgizýge, 46-sy hımııalyq óńdeý jumystaryn oryndaýǵa arnalǵan.
Mınıstrliktiń deregine sáıkes, shegirtke zııankesterine qarsy kúrestiń tıimdiligin arttyrý maqsatynda «FITOCENTRE» aqparattyq júıesi iske qosyldy. Sondaı-aq Birikken Ulttar Uıymynyń Azyq-túlik jáne aýyl sharýashylyǵy uıymy (FAO)-men birlesip tsıfrlyq tehnologııalardy, jasandy ıntellektini jáne ushqyshsyz ushý apparattaryn qoldanýǵa baǵyttalǵan seriktestik joba iske asyrylyp jatyr.
Óńirlerdegi jedel shtabtar shtattyq rejımde jumys isteıdi.
Buǵan deıin Qyzylordada 17,9 myń gektar jerde saıaq shegirtkeniń taralýy ekonomıkalyq zalal sheginen asqanyn jazǵanbyz.
