AShM daıyn ónim shyǵaratyn kásiporyndarǵa barynsha kómek berýdi kózdeıdi
ASTANA. QazAqparat - Aýyl sharýashylyǵy mınıstrligi ónim óńdeý kásiporyndarynyń naqty kartasyn jasap shyqty. Sonyń aıasynda memlekettik qoldaýǵa ıe bolatyn nysandar da anyqtaldy.
Osylaısha, agroónerkásip salasynda ımportty azaıtyp, otandyq taýarlardyń sanyn barynsha arttyrý josparlanyp otyr, dep xabarlaıdy QazAqparat tilshisi.
"Arnaıy jumys toby aýyl sharýashylyǵy salasyndaǵy ónim óńdeýdi jan-jaqty zerdelep shyqty. Tórt aı boıy kásipkerler, ǵalymdar, mınıstrlik pen jergilikti bılik ókilderi barlyq ónerkásip oryndaryn aralady. Málimetter jınap, saýalnama júrgizdi. Árbir kásiporynnyń ónim óńdeý kólemin, texnıkalyq jaǵdaıyn saraptap shyqty. Sonyń negizinde óńdeý kásiporyndarynyń bazasy jasaqtaldy. Búginde respýblıka boıynsha ondaı nysandardyń sany 1 345-ti quraıdy", - dedi QR Aýyl sharýashylyǵy mınıstri Asqar Myrzaxmetov Úkimettiń búgingi otyrysynda.
Alaıda qazirgi ımporttyq taýarlardyń kólemin eskere otyryp, ónim óńdeýdiń naqty 9 baǵyty anyqtaldy. Atalǵan baǵyttar boıynsha 435 kásiporyn jumys isteıdi. Sonyń ishinde sút, et, qant qyzylshasy, kartop, maıly daqyldar, bıdaı, kókónis, teri men jún óńdeý oryndary bar. Dál osy salalarda jumys istep jatqan kásiporyndarǵa memlekettik qoldaý jasalmaqshy. Aýyl sharýashylyǵy mınıstrligi olarǵa óz ónerkásipterin jańartýǵa, sondaı-aq jańa kásiporyndardy salýǵa jeńildetilgen nesıelerdi berýdi usynyp otyr.
"Atalǵan baǵyttar boıynsha berilgen nesıelerdiń mólsherlemesin sýbsıdııalaýǵa bolady. Máselen, syıaqy stavkasyn tómendetý boıynsha sýbsıdııany 4 paıyzdyń kóleminde bekitý týraly usynys bar. Oǵan 24,1 mlrd teńge qajet. Nesıe stavkasyn arzandatýǵa arnalǵan sýbsıdııany 10 paıyzǵa deıin berýge bolady. Osy maqsatqa 38,1 mlrd teńge kerek. Al jańa kásiporyndar men eski ónerkásipterdi jańartý sharalaryna taǵy 50 mlrd teńge qajet bolady. Jalpy, óńdeý kásiporyndarynyń Kartasyn tolyǵymen iske asyrýǵa tórt jylda 112,1 mlrd teńge ketedi", - dep atap kórsetti Asqar Myrzaxmetov.
