AShM: Bıylǵy balyq aýlaý lımıti - 64 myń tonna
Vıtse-mınıstr sóz arasynda balyq sharýashylyǵy óndirisi ekonomıkanyń áleýetti sektorlarynyń biri ekenin eske saldy. Onyń aıtýynsha, soǵan oraı, balyqtyń jasandy ósimin molaıtyp, olardyń tabıǵı ósimine jaǵdaı jasamaıynsha, balyq resýrstaryn turaqty paıdalaný da múmkin bolmaıdy.
«Jyl saıyn memlekettik tapsyrys aıasynda respýblıkalyq memlekettik qazynalyq kásiporyndar respýblıkanyń rezervtik sý aıdyndaryna 168 mln danaǵa jýyq baǵaly balyq túrleriniń shabaqtaryn jiberedi. Sonyń ishinde 7 mln danaǵa jýyq bekire balyqtarynyń shabaqtary Kaspıı teńizine jiberilip keledi. Budan bólek, elimizde balyq aýlaýǵa lımıt belgilenip, shekteýler jasalyp otyrady. Respýblıka boıynsha 2015 jylǵy balyq aýlaý lımıti 64 myń tonna dep bekitildi», - dedi E.Nysanbaev.
Sonymen qatar vıtse-mınıstr balyq ónimine degen suranystyń udaıy ósip kele jatqanyn, balyq ósirýmen aınalysatyn kásporyndar da balyq qoryn arttyrý úshin tıisti sharalardy qolǵa alǵanyn aıtady. Máselen, elimizde balyq ósirýmen 35-ke jýyq balyq ósirý kásiporny aınalysady. Al «Agrobıznes-2020» baǵdarlamasynda taýarlyq balyq ósirýdi damytý úshin memlekettik qoldaý sharalary qarastyrylǵan.
«Kaspıı teńiziniń bıologııalyq resýrstaryn, ásirese, bekire tuqymdas balyq túrlerin saqtaýǵa zor mán beriledi. Elbasy Kaspıı teńiziniń sý bıologııalyq resýrstaryn utymdy paıdalaný men saqtaýdy, sonymen birge, Kaspııdegi bekire balyqtaryn kommertsııalyq aýlaýǵa bes jylǵa moratorıı engizý mehanızmin ázirleýdi tapsyrdy. Ótken jyldyń qyrkúıek aıynda Astrahan qalasynda Kaspıı mańyndaǵy bes memleket osy kelisimge qol qoıdy. Balyq sharýashylyǵyn odan ári damytý jáne qoldanystaǵy normatıvtik-quqyqtyq bazany jetildirý maqsatynda mınıstrlik «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasyn ázirleýde», - deıdi vıtse-mınıstr.