AShM basshysy: Azyq-túlik ımportyn tolyq joıamyz deý — ýtopııa
ASTANA. KAZINFORM — Aýyl sharýashylyǵy mınıstri Aıdarbek Saparov Kazinform-ǵa bergen suhbatynda azyq-túlik ımportyn otandyq ónimmen almastyrýda qandaı saıasat ustanyp otyrǵanyn aıtty.
— Azyq túlik qaýipsizdigi men ózin-ózi tolyq qamtamasyz etýdiń aıyrmashylyǵy bar. Qazaqstanda áleýmettik mańyzy bar turmystyq taýarlardyń tizbesi bekitilgen jáne monıtorıng júrgiziledi. Osy 35 taýardyń ishinde et, sút, jumyrtqa, kókónis, qant sııaqty ónimder de bar. Importty almastyrý naqty osy taýarlarǵa baǵdarlanǵan. Al búkil azyq-túlik ımportyn almastyramyn deý — árıne, ýtopııa, bul ekonomıkalyq turǵydan ózin aqtamaıtyn is, — dedi Aıdarbek Saparov.
Mınıstr dúken sórelerindegi qatyrylǵan qus etiniń birazy qazaqstandyq ónim ekenin aıtady.
— Mysaly biz qus etin óndirý men sút óńdeýde alǵa jyljı aldyq. Keıingi 5 jylda qus etin óndirý kólemi 150 myń tonna artty. Qazaqstannyń ár túkpirinde qatyrylǵan otandyq qus eti bar. Buryn negizinen ımport tutynatynbyz. Sórelerde jyl on eki aı qazaqstandyq jylyjaılardan ákelingen kókónis turatynyn baıqaǵan shyǵarsyz, — degen vedomstvo basshysy Soltústik Qazaqstannyń tájirıbesi sút óńdeý salasynyń damýyna túrtki boǵlanyn eske saldy.
Mınıstr bul jerde ishki óndiristiń múmkindiginen bólek ekonomıkalyq jaǵy taǵy bar ekenin aıtady.
— Import ónimderdiń baǵa jaǵynan básekege qabileti joǵary. Onyń ishinde memlekettik qoldaý saıasatynyń róli erekshe. BUU Azyq-túlik jáne aýyl sharýashylyǵy uıymynyń málimeti boıynsha, Belarýs eliniń agroónerkásipti qoldaý deńgeıi 22%-ǵa jetken. Al Qazaqstanda 6% deńgeıinde, — deıdi vedomstvo basshysy.
Buǵan deıin álemdegi sıyr etiniń baǵasy men Qazaqstandaǵy baǵany salystyrǵan edik.
