AShM azyq-túlik taýarlary baǵasyn turaqtandyrý tetikterin usyndy
ASTANA. QazAqparat - Búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov Mınıstrlik quzyretiniń aıasynda áleýmettik mańyzy bar taýarlar baǵasynyń ósýin boldyrmaý úshin qolǵa alynyp jatqan sharalardy baıandady, dep habarlaıdy QazAqparat.
«Azyq-túlik ónimderiniń baǵasyn bir qalypta ustap turý zań boıynsha jergilikti atqarý organdaryna júktelgen. Atalǵan sheshim, 2012 jyly qabyldanyp, sol jyly 12,6 mlrd. teńge respýblıkalyq bıýdjetten jergilikti bıýdjetke bólindi», - dedi Q.Aıtýǵanov.
Azyq-túlik taýarlarynyń naryqtaǵy jaǵdaıy boıynsha árbir ákimdik turaqtandyrý qorlarynan qansha mólsherde qarajat bólý kerektigi jóninde sheshim qabyldaıdy.
Qyrkúıek pen qarasha aılarynyń aralyǵynda 1493 jármeńke uıymdastyrylyp, 9,1 mlrd. teńgeniń kóleminde ónimder satyldy. Al 2015 jyly mundaı jármeńkelerdiń sany 3500-ge jetti.
Birinshi vıtse-mınıstrdiń aıtýynsha, baǵany turaqtandyrý múmkindikteri tolyqqandy júzege asyrylmaı jatyr. Mysaly, turaqtandyrý qorlaryna bólingen qarjynyń bir bóligi depozıtterde. Sonymen qatar, keıbir óńirlerde depozıtterdiń kólemi bólingen qarajattyń jartysynan asady. Osyndaı jaǵdaı tıimsiz uıymdastyrýdyń saldary bolyp tabylady.
«Osy turǵyda azyq-túlik baǵasyn turaqtandyrýdyń úsh mehanızmin usynyp otyrmyz: turaqtandyrý qorlarynyń jumys tártibin jeńildetý; memlekettik-jeke menshik seriktestik qaǵıdasy boıynsha áleýmettik kásipkerlik korporatsııasy men jeke menshik kompanııa arasyndaǵy qurylǵan kásiporyndar arqyly turaqtandyrý qorlaryn basqarý; saýda nysandaryna talaptardy ázirleý», - dedi Aıtýǵanov.
Qazirgi tańda úshinshi mehanızm Astana qalasynyń ákimdigimen júzege asyrylyp jatyr.
Munan ary ol kóterme-taratý ortalyqtarynyń mańyzy týraly aıtyp ótti.
«Eksporttyq áleýetti arttyrý turǵysynan bul máseleniń mańyzy zor. Sondyqtan, AÓK-ti damytý memlekettik jańa baǵdarlamasynyń aıasynda kóterme-taratý ortalyqtary júıesin jasaýǵa erekshe nazar aýdarylady. Olardyń basty maqsaty óndirýshi men jekelep satýshylar arasyndaǵy júıeni ońtaılandyrý jáne aýyl sharýashylyǵy kooperatıvteriniń áleýetin qoldaný bolyp tabylady», - dedi Qaırat Aıtýǵanov.
