AShM azyq-túlik baǵasy respýblıkalyq deńgeıden joǵary óńirlerdi atady

ASTANA. KAZINFORM – Bıylǵy jyldyń І toqsanynyń qorytyndysy boıynsha jyldyq ınflıatsııa 11 paıyzdy qurady. Azyq-túlik ónimderiniń baǵasy 11,7 paıyzǵa, al áleýmettik mańyzy bar taýarlar boıynsha 5,4 paıyzǵa ósken.

Bul týraly Aýyl sharýashylyǵy mınıstri Aıdarbek Saparovtyń tóraǵalyǵymen keńeste aıtyldy, dep habarlaıdy mınıstrliktiń baspasóz qyzmeti.

Basty taqyryp – azyq-túlik qaýipsizdigin qamtamasyz etý jáne áleýmettik mańyzy bar azyq-túlik taýarlarynyń baǵasyn turaqtandyrý.

-Halyqty azyq-túlikpen qamtamasyz etý basym baǵyttardyń biri. Inflıatsııanyń ósýi, sonyń ishinde azyq-túlik baǵasynyń qymbattaýy eldiń azyq-túlik qaýipsizdigine tikeleı áser etedi. Aýyl sharýashylyǵy salasy aıtarlyqtaı nátıjege qol jetkizgenimen, birqatar júıeli máselelerdiń áli de bar ekeni anyq. Sondyqtan ishki naryqty turaqty qamtamasyz etý jáne baǵany turaqtandyrý úshin qosymsha tıimdi sharalar qabyldaý qajet», – dedi mınıstr.

Osy baǵytta birqatar retteý tetikteri iske asyrylyp jatyr. Máselen, turaqtandyrý qorlarynda áleýmettik mańyzy bar azyq-túlik taýarlarynyń qorlary qalyptastyrylyp, saýda jelilerinde «aınalym shemasy» engizilgen, áleýmettik mańyzy bar taýarlar tizimi 19-dan 31 ataýǵa deıin keńeıtildi, sondaı-aq saýda ústemesi (15 paıyzdan asyrmaý) baqylaýǵa alynǵan. Soǵan qaramastan, baǵanyń ósý qaýpi bar.

Vıtse-mınıstr Azat Sultanovtyń aıtýynsha, azyq-túlik ónimderi tutyný sebetiniń 40 paıyzdan astamyn quraıdy jáne ınflıatsııanyń negizgi qozǵaýshy faktorlarynyń biri bolyp otyr.

- Orta respýblıkalyq deńgeıden joǵary kórsetkish 12 óńirde tirkeldi, olardyń qatarynda Ulytaý (9,7%), Mańǵystaý (8,7%), Aqtóbe (7,7%) jáne Jambyl (7,2%) oblystary bar,-dedi vıtse-mınıstr.

Sondaı-aq májiliste kóptegen ónimder jetkilikti kólemde óndirilip jatqanyn, soqan qaramastan osyndaı jaǵdaı qalyptasyp otyrǵany aıtyldy. Bul «óndiris – saqtaý – ótkizý» tizbeginde teńgerimsizdikter bar ekenin kórsetedi.

Aıta keteıik jıynǵa oblys ákimderiniń orynbasarlary, aýyl sharýashylyǵy basqarmalarynyń basshylary, qarjy ınstıtýttarynyń ókilderi, sondaı-aq QR Aýyl sharýashylyǵy mınıstrliginiń komıtetteri men departamentteriniń jetekshileri qatysty.

Osyǵan deıin bıyl azyq-túlik óndirisi 9,5%-ǵa artatyny týraly jazdyq.

Sonymen qatar Aýyl sharýashylyǵy vıtse-mınıstri Azat Sultanov teńgeniń nyǵaıýy azyq-túlik baǵasyn tómendetýge áseri týraly aıtty.