AShM Atyraý men Aqtóbe oblysynda 30-dan astam iri qaranyń qyrylýyna ne sebep bolǵanyn málimdedi

ASTANA. QazAqparat - Atyraý jáne Aqtóbe oblystarynda 30-dan astam iri qaranyń qyrylýyna pasterellez sebep boldy. Bul týraly búgin Aýyl sharýashylyǵy mınıstrligi Veterınarlyq qadaǵalaý jáne baqylaý komıteti tóraǵasynyń orynbasary Tursyn Qabduldanov málim etti.

«Búgingi kúni Atyraý oblysyndaǵy jaǵdaı boıynsha pasterellez dıagnozy qoıyldy. Saraptamaǵa sáıkes sharalar atqarylýda, janýarlar, maldar pasterellezge qarsy egilip jatyr. Qaıta indetke shaldyqqan maldar baıqalmady. Jaǵdaı tolyq baqylaýda», - dedi baspasóz máslıhaty barysynda T.Qabduldanov.

«Al Aqtóbe oblysyna kelsek, bizge jetken jedel habarlamaǵa sáıkes, Álııa aýylynda 13 bas iri qara maldyń indet juqtyrǵany anyqtalǵan. Olardan pasterellez ben lesterezge qatysty klınıkalyq belgiler baıqalǵan. Alynǵan materıaldar zerttelip jatyr. Ondaǵy jaǵdaıdy jergilikti atqarýshy organ men memlekettik veterınarlyq qyzmet baqylap otyr», - dedi ol.

Buǵan deıin belgili bolǵanyndaı, Atyraý oblysynyń Mahambet aýdany Alǵa aýlynda 39 bas iri qara maldan pasterellez indetine shaldyqqan belgiler baıqalyp, olardyń ishinde 11 mal qyrylǵan bolatyn. Budan bólek, Atyraý qalasynyń mańyndaǵy Qaıyrshaqty eldi mekeninde de 33 iri qaranyń indet juqtyrǵany, 17 maldyń qyrylýy tirkelip, olardan da pasterellez belgileri anyqtalǵan.

«Osy óńirlerdegi epızootnıkalyq jaǵdaı memlekettik veterınarlyq-sanıtarlyq baqylaý ınspektorlarynyń udaıy qadaǵalaýynda», - delingen AShM habarlamasynda.