AShM: Astyq daqyldarynyń aýrýlary 2,4 mln gektarǵa taralýy múmkin
«Astyq daqyldarynyń aýrýlarǵa shaldyǵý aýmaǵy 2,4 mln gektar jerge jetedi dep boljanyp otyr. Respýblıkalyq bıýdjet esebinen 1,6 mln. gektar nemese boljamdy kórsetkishtiń 65 paıyzy (2,5 mlrd. teńge) óńdeledi. Onyń ishinde Aqmola oblysynda - 569 myń gektar, Qostanaı oblysynda - 478 myń gektar, sondaı-aq Soltústik Qazaqstan oblysynda 517 myń gektar alqap qamtylady»,-dedi Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov.
Onyń sózine qaraǵanda, bólingen bıýdjet qarjysy árqashan orta eseppen alǵanda 60-65 paıyz jerdi qamtıtyndyǵyn eskere otyryp, oblys ákimdikteri fermerlermen birlesken egisterdi aýrýlardan qorǵaý sharalaryn uıymdastyrýy qajet.
Budan bólek Aıtýǵanov shegirtkege qarsy alqaptardy óńdeý jumystary josparlanǵan barlyq jerde júrgiziletinin atap ótti.
QR AShM málimetinshe, bıyl elimizdegi egis alqabynyń jalpy aýdany 22,5 mln gektardy qurady, bul ótken jylmen salystyrǵanda 650 myń gektarǵa artyq. Egin egý jumystaryn ártaraptandyrý aıasynda suranysy joǵary daqyldardy egetin alqaptar 1 mln 348 myń gektarǵa ulǵaıtyldy.