AShM 3-synypty azyqtyq bıdaıdyń tonnasyn 40 myń teńgeden satyp alýdy usynady
ASTANA. 28 tamyz. QazAqparat - Aýyl sharýashylyǵy mınıstrligi múddeli memlekettik organdarǵa Úkimettiń qaýly jobasyn engizdi.
Ol boıynsha memlekettik satyp alý resýrstary úshin 3-synypty azyqtyq bıdaıdyń tonnasyn 40 myń teńgeden satyp alý usynylady. Bul týraly búgin Aýyl sharýashylyǵy mınıstrliginde ótken brıfıng barysynda vedomstvo jaýapty hatshysy Evgenıı Aman málim etti.
Jaýapty hatshynyń aıtýynsha, qaýly jobasyna sáıkes, azyqtyq bıdaıdan bólek 4-synypty jemdik bıdaı tonnasy 36 myń teńgeden, 2-synypty arpany 32 myń teńgeden satyp alý usynylady. «Budan bólek, astyqty satyp alý úshin bıýdjetten 18,6 mlrd. teńge bólinip otyr. Bul rette shamamen 480 myń tonna azyqtyq bıdaı men 5 myń tonnaǵa jýyq jemdik bıdaı satyp alý josparlanǵan», - dedi ol.
