AShM 10 jyldan artyq qoldanysta bolǵan tehnıkalardy jańartpaq
«Parkterdiń jaǵdaıymen qazir eshkimdi de tańǵaldyra almaımyz. Buryn biz qoldanysta júrgenine 17 jyldan asyp ketken tehnıkalarǵa taldaý júrgizip kelgen bolatynbyz. Endigi kezekte aldymyzǵa aıtarlyqtaı órshil jospar qoıyp otyrmyz, ıaǵnı qoldanysta júrgenine 10 jyldan asyp ketken tehnıkalardyń barlyǵyn jańartqymyz keledi. Bul baǵytta jaǵdaı kúrdeli ekenin aıta ketý kerek. Tozyǵy jetken tehnıkalar óte kóp. Elimizdegi traktorlardyń 86 paıyzynyń, kombaındardyń 72 paıyzynyń qoldanylyp júrgenine 10 jyldan asyp ketken», - deıdi Sultanov.
Onyń aıtýynsha, tehnıkalardyń kóbi keńes dáýirinen beri qyzmet etip kele jatyr. Al odan bergi tehnıkalar óziniń materıaldyq-tehnıkalyq sıpaty jaǵynan eskirgenderdiń qataryna jatady.
«Ókinishke qaraı, 2017 jyldyń qorytyndysy tehnıkalarǵa qol jetkizý men olardy jańartý turǵysynan tómendeýdi kórsetip otyr. Sondyqtan, bizdiń maqsat - aýyl sharýashylyǵy taýaryn óndirýshilerdi zamanaýı tehnıkalarmen qamtamasyz etý», - dep túıdi Azat Sultanov.
Departament dırektory atalǵan maqsatqa jetý jolyndaǵy AShM-niń josparymen de bólisti.
«Mınıstrlik ne usynady? Birinshiden - aýyl sharýashylyǵy tehnıkasynyń lızıngi men nesıesi úshin paıyzdyq mólsherlemeni sýbsıdııalaýdy qalpyna keltirmek. Bul baǵdarlama buryn óziniń tıimdiligin dáleldegen bolatyn. Baǵdarlamany qaıtara otyryp, mólsherlemeni arttyrýdy - demek, basqa mınıstrlikterdegi áriptesterimizdi sýbsıdııa mólsherlemesin 10 paıyzdyq deńgeıde maquldaýyna qol jetkizbekpiz. Bizdiń oıymyzsha - bul eń tıimdi ádis», - deıdi ol.
A.Sultanov sonymen birge, ınvestıtsııalyq sýbsıdııa joly da asa paıdaly ekenin alǵa tartady.
«Buryn tehnıkany modelderi boıynsha qazaqstandyq, qytaılyq, TMD nemese azııalyq dep bólgen edik. Al qazir aýyl sharýashylyǵy taýaryn óndirýshiler teń dárejede sapaly tehnıkaǵa qol jetkize alýy úshin sýbsıdııalaýdyń eski ádisine qaıtyp kelmekpiz», - dedi Sultanov.