Áshkeev pen Nursultanov WBC beldikteri úshin jekpe-jekter ótkizedi
NUR-SULTAN. QazAqparat – Qazaqstandyq kásipqoı boksshylar Madııar Áshkeev (13-0, 6KO) pen Meıirim Nursultanov (12-0, 8KO) WBC beldikteri úshin jekpe-jek ótkizedi, dep habarlaıdy QazAqparat tilshisi.
«Qazaqstan kásipqoı boksy» akkaýnty VKontakte áleýmettik jelisinde málim etkendeı, Madııar Áshkeev Kalıfornııa shtatynda ótetin boks keshiniń basty jekpe-jeginde óner kórsetedi. Ol WBC nusqasy boıynsha AQSh chempıony beldigi úshin 21 márte jeńiske jetken Kleotıs Pendarvıspen (21-5-2, 9KO) judyryq túıistiredi. Aıqas 9 qarashada Gavaıan Gardens qalasynda ótedi.
BoxRec.com aqparatyna súıensek, 33 jastaǵy Kleotıs Pendarvıspen aıqasta WBC nusqasy boıynsha birinshi orta salmaqtaǵy tıtýl sarapqa salynady. Sońǵy aıqasyn Madııar Áshkeev 5 shildede ýkraınalyq Igor Fanııanǵa qarsy ótkizip, jeńis tuǵyrynan kóringen edi. Al Pendarvıs óziniń sońǵy jekpe-jeginde Abel Sanchestiń shákirti ýkraınalyq Sergeı Bogachýkke (15-0, 15KO) ese jibergen.
Al qazaqstandyq taǵy bir kásipqoı boksshy Meıirim Nursultanov Jánibek Álimhanulynyń burynǵy qarsylasy meksıkalyq Krıstıan Olıvaspen (16-5, 13KO) kezdesedi.
BoxRec.com aqparatyna saı, 27 jastaǵy meksıkalyq otandasymyzben orta salmaqta WBC (USNBC) nusqasy boıynsha AQSh chempıony ataǵy úshin baq synaspaq. Aıqas 10 raýndqa eseptelgen. Aıta ketsek, Meıirim Nursultanov Kanelo-Kovalev aıqasynyń anderkartynda jekpe-jekke shyǵatyny buǵan deıin habarlanǵan bolatyn.
Olıvas osy jyldyń 12 sáýirinde Jánibek Álimhanulymen (7-0, 3KO) shyǵyp, ese jibergen edi.
