Áshirbek Syǵaı aıtqan 10 pikir

«Teatr óneri úshin búgin qaraly kún. Áshirbekteı dańqty uly, synshy ortamyzdan ketti. Bul bir qabyrǵamyz qulap túskenmen birdeı. Qazaqta aǵa dos, ini dos degen bar. Ol maǵan ini dos edi. Ol týraly aıtylar sóz kóp. Saǵynamyz. Qaıran, Ásheke! Ózimnen kishi inilerim ketip jatqanda, myna bizderdiń jaǵdaıyzdy túsinip turǵan shyǵarsyzdar. Ol - men úshin tiri. Júregimde! Teatr ony izdeıdi», - dedi Qazaqstannyń halyq ártisi Asanáli Áshimov aqtyq saparǵa shyǵaryp salý kezinde. Osy oraıda, teatrlife.kz saıty ázirlegen Áshirbek Syǵaıdyń aforızmge tatyrlyq 10 pikirin bere ketkendi jón kórdik. Áshirbek Syǵaı: 1. Bir ǵana komanda bar, ol - qazaq, qazaqstan komandasy. 2. Qazaqtyń jeri keń, qoınaýy qazynaǵa baı. Biraq sol ulan-ǵaıyr dalamyz bar. Sanymyz az. Osy olqylyqtyń ornyn qalaıda toltyrý kerek, qazaqqa shuǵyl túrde kóbeıý qajet. 3. Halyqtyń sanyn kóbeıtýimiz tıis. Eger halyqtyń sany 20 mıllıonǵa jetse, onda qazaq halqynyń til máselesi mundaı ótkir kúıinde birinshi kezekte turmas edi. 4. Qazaqtyń júregi toqtamasyn, ónerdiń júregi toqtamasyn dep otyrǵanym sol. Ónerin óltirip alǵan qazaq el bolyp ońbaıdy, elinen aınyp qalǵan júrek - júrek bop soǵyp jarytpaıdy. Ekeýi bólinbes bir bútin, tutas dúnıe dep esepteımin. Endeshe, júregimiz toqtamasyn! 5. Klassıkaǵa durystap moıyn bura almaı júrgenderdiń qadiri qashýy múmkin. Al klassıkanyń qadiri eshýaqytta qashpaıdy. Óıtkeni, ol - klassıka. Klassıka degen - máńgilik taǵdyr tapqan, máńgilik tarıh tapqan rýhanı dúnıe. 6. Qalyń kópke birdeı jaǵý qıyn nárse. Ol - óte sırek bolatyn protsess. Barlyǵyna birdeı unaý degen bolmaıdy. Óıtkeni árkimniń ózindik "meni", ózindik talǵamy, qısyny, qabyldaý júıesi, qorytý deńgeıi, múmkindigi bolady. 7. Sahnada, ekranda kileń shińkildek, usaq akterler kóbeıdi, eki ıyǵyna eki kisi mingendeı faktýra joq. Keskin kelbeti kelisken kermıyqtarǵa zárýmiz. Maıda tartyp baramyz. Shińkildep, elpildep kettik. 8. Qajymuqandy orta boıly, sıdıǵan jigitter oınaıtyn bolyp júr. Qamardy kórip qarnyń ashady. Ne daýys joq, ne rýh joq. Dene turpaty ǵana emes, qımyly, rýhy kishkentaı. Qaragóz bolyp tolqytyp, Qamar bolyp jylata almaıdy, qyz Jibek bolyp egiltip, Eńlik bolyp eljirete almaıdy meni. Mine, barlyq tragedııa osynda jatyr. 9. Shtamp degen - qazir qazaq sahnasynyń negizgi derti. Ol ne degen sóz? Birizdilik, sol baıaǵy bir uqsastyq, Anaý rólinde de, mynaý rólinde de qoly erbeń-erbeń, sol baıaǵy daýys, sol baıaǵy ún, sol qımyl, sol kúlki. Esh ózgeris joq. 10. «Otellony» Muhtar Áýezov keremet aýdarǵan. Al endi sony qazaq tiliniń tabıǵatynan, qunarynan beımaǵlum rejısserdiń yńǵaıyna qarap, qaıshy ala júgirý, kúzep salý, túzep salý - men muny jaqsylyqtyń nyshany dep oılamaımyn.