Áshimbaev Jambyldaǵy oqıǵa jaıynda: Mundaı syn-saǵatta sabyr saqtaý mańyzdy

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev Jambyl oblysyndaǵy áskerı bólimde bolǵan jarylysqa qatysty pikir bildirdi, dep habarlaıdy QazAqparat tilshisi.

«Jambyl oblysynda bolǵan tótenshe jaǵdaı bárimizdi alańdatyp otyrǵany ras. Mundaı syn-saǵatta, eń aldymen, sabyr saqtaýdyń mańyzdy ekeni túsinikti. Qazir apat aýmaǵyndaǵy ahýal Memleket basshysynyń baqylaýynda. Prezıdentimizdiń tapsyrmasymen tıisti organdardyń basshylary oqıǵa ornyna shuǵyl baryp, oblys basshylyǵymen birlesip áreket etýde. Sondaı-aq, Baızaq aýdanynda jedel shtab qurylyp, qutqarýshylar, áskerı qyzmetshiler, dárigerler jáne basqa da belsendi azamattar jumys istep jatyr. Ókinishke qaraı, qaza tapqandardyń bar ekeni belgili boldy. Opat bolǵandardyń otbastary men jaqyndaryna qaıǵylaryna ortaqtasyp, kóńil aıtamyz jáne apattan zardap shekkenderdiń tezirek saýyǵyp ketýin tileımiz», - dep jazdy Senat Tóraǵasy Facebook paraqshasynda.

Esterińizge sala ketsek, keshe saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, arty birneshe jarylysqa aınalǵan-dy. Sonyń saldarynan osy ýaqytqa deıin 4 áskerı qyzmetshiniń qaza tapqany, 3 áskerı qyzmetshi men tótenshe jaǵdaılar departamentiniń birneshe mamanymen baılanystyń joqtyǵy belgili bolǵan edi.