Áshimbaev: Ulttyq múddelerdi qurmetteýge negizdelgen yntymaqtastyq TMD elderiniń turaqty damýyna áser etedi

ASTANA. QazAqparat - Senat Tóraǵasy Máýlen Áshimbaev bir top Parlamet depýtatymen birge TMD Parlamentaralyq Assambleıasynyń is-sharalaryna jáne Qazaqstan men Ózbekstan Parlamentteri Senattary arasyndaǵy Yntymaqtastyq jónindegi komıssııanyń jumysyna qatysý úshin Ózbekstanǵa bardy, dep habaralıdy QazAqparat.

Máýlen Áshimbaev TMD PAA Keńesiniń otyrysynda sóılegen sózinde bıyl Qazaqstan Táýelsiz Memleketter Dostastyǵyna tóraǵalyq etetinine toqtaldy. Sondaı-aq ol ózara múddeli salalardaǵy is-qımyldy nyǵaıtýǵa jáne yntymaqtastyqty arttyrýǵa baǵyttalǵan jumystyń negizgi basymdyqtary men nátıjelerine nazar aýdardy.

Senat Tóraǵasy TMD Sammıtinde Qazaqstan Prezıdenti Qasym-Jomart Toqaev Dostastyq aıasyndaǵy yntymaqtastyqty damytý boıynsha birqatar jańa bastama usynǵanyn atap ótti. Osyǵan oraı Máýlen Áshimbaev áriptesterin Qazaqstannyń usynystaryn qoldaýǵa shaqyrdy. Odan bólek, parlamenttik dıplomatııany odan ári ilgeriletýdiń jáne TMD elderiniń zań shyǵarýshy organdary arasyndaǵy yntymaqtastyqty nyǵaıtýdyń mańyzdylyǵyn tilge tıek etti.

«Pragmatıkalyq jáne ózara senimdilik baǵytynda birlesken jumysymyzdy dáıekti túrde jalǵastyrý óte mańyzdy. Bizdiń elderimizdiń ulttyq múddelerin ózara qurmetteýge negizdelgen jan-jaqty yntymaqtastyq Dostastyq keńistiginde uzaq merzimdi ornyqty damýdyń irgetasy ekeni anyq. Bul ekonomıkanyń ósýine jáne barlyq múshe elder azamattarynyń ál-aýqatyn arttyrýǵa jaǵdaı jasaıdy. Dál osyndaı formatta TMD Parlamentaralyq Assambleıasy alańyndaǵy ózara is-qımyl jáne dıalog qalyptasady» , – dedi Máýlen Áshimbaev.

Senat Spıkeri Qazaqstan Konstıtýtsııasyna ózgerister men tolyqtyrýlar engizý máseleleri jónindegi respýblıkalyq referendýmǵa halyqaralyq baıqaýshylar tobyn jibergeni úshin TMD elderiniń Parlamentaralyq Assambleıasy men Parlamentterindegi áriptesterine alǵys bildirdi.

«Qazaqstan úshin bul referendýmnyń tarıhı mańyzy zor boldy. Referendýmnyń nátıjesi Memleket basshysynyń bastamasymen elimizde júrgizilip jatqan aýqymdy konstıtýtsııalyq reformalardy bekite tústi. Qazaqstandyqtar júıeli ózgerister men evolıýtsııalyq damýdy qoldap daýys berdi. Konstıtýtsııaǵa engizilgen túzetýlerdiń qabyldanýy elimizdiń bılik ınstıtýttaryn qalyptastyrý men ózara is-qımyldyń jańa modeline kóshýge jol ashady» , – degen Máýlen Áshimbaev Dostastyqtyń parlamentshilerin bıylǵy 20 qarashada ótetin Qazaqstan Respýblıkasy Prezıdentiniń merziminen buryn saılaýyna daıyndyq pen ony ótkizý barysyn baqylaýǵa belsendi qatysýǵa shaqyrdy.