Áshimbaev: Latyn álipbıine kóshý Qazaqstannyń ulttyq múddesine saı
ASTANA. QazAqparat - Qazaq tilin latyn álipbıine kóshirý óte durys qadam. Búgin Parlament Májilisindegi jalpy otyrystan keıin depýtat Máýlen Áshimbaev osylaı málim etti, dep habarlaıdy QazAqparat.
«Qazaq tilin latyn álipbıine kóshirý máselesi birinshi ret kóterilip otyrǵan joq. Elbasynyń birneshe jyl burynǵy Joldaýynda bul taqyryp naqty atap kórsetilgen edi. Meniń oıymsha, bul durys qadam, sondaı-aq elimiz úshin údemeli ilgerileýshiliktiń qadamy. Biz belgili bir ótpeli kezeń qajet bolatynyn, tıisti qıyndyqtar týyndaýy múmkin ekenin túsinýimiz kerek. Bul turǵyda halyqty daıarlaýǵa, túsindirý jumystaryn júrgizýge qajetti ǵylymı jumystarǵa baılanysty sharalar qamtylatyny anyq. Strategııalyq perspektıvada latyn álipbıine kóshý elimiz úshin durys qadam dep paıymdaımyn, sebebi ol bizdiń memlekettiń ulttyq múddesine saı keledi», -dep túsindirdi depýtat.
Onyń sózine qaraǵanda, búginde ekonomıkalyq ahýal turaqtalyp kele jatqandyqtan, konstıtýtsııalyq reformadan soń Qazaqstannyń uzaq merzimdi múddelerin qamtamasyz etýge baǵyttalǵan qandaı da bir strategııalyq qadamdardy iske asyrý qajet.
M. Áshimbaevtyń paıymynsha, zańnamalyq baǵytta mańyzdy jumystardan keıin Memleket basshysy osyndaı bastamany jarııalady.
«Men bul sheshimdi qoldaımyn. Latynǵa kóshý sharalary kezeń-kezeńmen júrýi tıis. Osy oraıda memlekettik organdar bul baǵyttaǵy protsesti laıyqty deńgeıde, ıaǵnı josparly negizde iske asyrýy qajet. Atap aıtqanda, alda atqarylatyn sharalar aıasynda Úkimet saýatty baǵdarlamany qurýy tıis. Túsindirý jumystary, keńesterdi baıyppen júrgizý kerek. Osydan keıin birtindep latyn álipbıine kóshirýdi iske asyrýǵa bolady», - dep túıindedi sózin depýtat.
Aıta keteıik, QR Prezıdenti Nursultan Nazarbaev «Egemen Qazaqstan» gazetine shyqqan maqalasynda latyn álipbıine kóshýdiń naqty kestesin ázirleýdi tapsyrǵan bolatyn.
Elbasy 2017 jyldyń aıaǵyna deıin ǵalymdardyń kómegimen, barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerektigin de jetkizdi. Al 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisken durys dep sanaıdy.
