Áshimbaev Qazaqstannyń basqa memleketterge kómeginiń mańyzdylyǵyn túsindirdi
ASTANA. QazAqparat - Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev Qazaqstannyń qoldaýǵa muqtaj elderge gýmanıtarlyq kómek kórsetý sharalaryn jalǵastyrýy qajettigin atap ótti, dep habarlaıdy QazAqparat.
Májilistegi Úkimet saǵaty barysynda depýtat sońǵy jyldary Qazaqstan keıbir kórshiles elderge, Aýǵanstanǵa eleýli kómek kórsetip kele jatqanyn, osy oraıda azyq-túlik, eń qajetti zattar jóneltilip, basqa da qoldaý sharalaryna úlesin qosqandyǵyn eske salyp ótti.
Sońǵy jyldary Qazaqstan bul maqsattarǵa 350 mln. dollardan astam qarjy bólgen eken.
«Elimizde problemalar bar kezde ózge memleketterge syrtqy kómek jasaýdyń qajettigi joq degen pikirdiń bar ekenin bilemin. Osy rette damýǵa resmı kómek jasaý - ol qaıyrymdylyq emes, ıaǵnı basqa elderge birrettik kómekke jatpaıdy. Bul óz kezeginde naqty syrtqy saıası maqsattarǵa jetý úshin ıkemdi tetik bolyp tabylady. Ekonomıkalyq yntymaqtastyq jáne damý uıymynyń kóptegen elderi osyndaı saıasatty júrgizip keledi. Sondyqtan da damýǵa resmı kómek jasaý qadamdaryn tereń uǵynyp jasap, syrtqy saıasattyń basymdyqtaryna naqty oraılastyrý kerek»,-dedi Áshimbaev.
Osy oraıda ol gýmanıtarlyq kómek jasaýdy qysqartý durys emes ekenin, eger de kórshiles elder problemalar shyrmaýynan shyǵa almaı jatsa, eshbir memleket uzaq merzimdi damýdan úmittene almaıtyndyǵyn jetkizdi.
«Ortalyq Azııa turaqsyzdyqtyń, zańsyz kóshi-qonnyń, lańkestiktiń aýmaǵyna aınalsa, onda bunyń saldary elimizdegi jaǵdaıǵa yqpal etpeı qoımatyny anyq»,-dedi depýtat.
