Ashyqbaev jańa qaýipsizdik arhıtektýrasy qalaı qurylýy keregin aıtty
ASTANA. KAZINFORM – Qaýipsizdiktiń jańa arhıtektýrasy «óńirlik turaqtylyqtan jahandyq beıbitshilikke» qaǵıdaty negizinde qurylýy tıis. Bul týraly elordada ótip jatqan ІІ Astana Think Tank Forum-2025 halyqaralyq forýmynda Syrtqy ister mınıstriniń birinshi orynbasary Erjan Ashyqbaev aıtty.
- Astana ortaq ári bólinbeıtin Eýroatlantıkalyq, Eýrazııalyq qaýipsizdik qaýymdastyǵyn qalyptastarý jónindegi kópjaqty kúsh-jigerdi qoldaıdy. Bizdiń paıymyzsha, qaýipsizdiktiń jańa arhıtektýrasy tek qana ınstıtýtsonaldy reformalarmen qurylýy múmkin emes. Ol myzǵymastyq, kópjaqtylyq qaǵıdattaryn rastaýdy jáne barlyq múshe memleket quqyǵynyń ústemdigin talap etedi. Biz jahandyq basqarý júıesinde qaýipsizdiktiń óńirlik aspektisine barynsha mańyzdy mártebe berýdi jaqtaımyz. Qaýipsizdiktiń jańa arhıtektýrasy «tómennen joǵary», «óńirlik turaqtylyqtan jahandyq beıbitshilikke qaǵıdaty» negizinde qurylýy tıis, - dedi Erjan Ashyqbaev.
Onyń aıtýynsha, jyldam tehnologııalyq progress jaǵdaıynda qaýipsizdik salasyndaǵy syn-qaterler jańa ári kúrdeli ózgeristerge ıe bolyp otyr. Mundaı qaterlerdiń biri jasandy ıntellektini retteýdiń ortaq halyqaralyq aıasyn ázirleý bolyp tur.
- Qazaqstan jasandy ıntellekt boıynsha álemdik tásilder men normatıvtik standarttardy úılestirýge baǵyttalǵan osy saladaǵy jahandyq dıalogqa belsendi qatysatynyn rastaıdy. Jasandy ıntellektige qol jetkizý ádil, ashyq bolýy tıis ekenine senemiz. Bul jaı ǵana tehnologııalyq múmkindikter máselesi emes. Sóz teńdeı múmkindikter, memleketterdiń tsıfrlyq egemendigi jáne barlyq eldiń bolashaq jahandyq damýdy qalyptastyrýǵa ádil qatysýy jaıynda bolyp otyr, - dedi SІM birinshi orynbasary.
Aıta keteıik, forým barysynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.
QR Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan is-sharaǵa álemniń 20 elinen 40-qa jýyq sheteldik sarapshy, jetekshi «aqyl-oı ortalyqtarynyń» basshylary men zertteýshileri qatysyp jatyr. Forým aıasynda ótetin 9 taqyryptyq sessııada álemdik saıasat pen halyqaralyq qatynastardyń negizgi baǵyttary talqylanbaq.