Ashyq sýda júzýden qazaqstandyq sportshy el tarıhynda tuńǵysh chempıon atandy
Ashyq sýda júzýden ótken «Oceanman» halyqaralyq jarysynda top jaryp, Qazaqstan tarıhynda tuńǵysh ret álem chempıony atanǵan elordalyq Alpamys Ámir elge oraldy, dep habarlaıdy Kazinform elorda ákimdiginiń resmı saıtyna silteme jasap.
Taıland eliniń Phýket qalasynda ótken baıraqty básekege álemniń túkpir-túkpirinen barǵan 70 eldiń sportshysy júldeli oryndarǵa talasty. Jıyrma jyldan beri úzdiksiz uıymdastyrylǵan halyqaralyq jarysqa Qazaqstan atynan elordalyq Alpamys Ámir qatysty.
Otandasymyz Іnspiration sanaty boıynsha 2 shaqyrymdyq qashyqtyqqa júzýden qarsylas shaq keltirmedi.
«Halyqaralyq jarysta mektebimizdiń sportshysy chempıon atandy. Alpamys Ámir «Barys» sport kesheninde aptasyna 6 ret jattyǵady. Álem chempıonatyna sáýir aıynan bastap tyńǵylyqty daıyndaldy. Eńbek pen tózimdilik jemisin berdi. Sportshymyzben maqtanamyz. Sport damý ereksheligine qaramastan barlyǵyna ortaq ekeni qýantady», - dedi Intellektýaldy damý erekshelikteri bar adamdarǵa arnalǵan sport federatsııasynyń prezıdenti Dına Temirǵalıeva.
Alpamysty áýejaıdan qalalyq Dene shynyqtyrý jáne sport basqarmasynyń basshysy Samat Jylqybaev, sportshynyń týǵan-týystary, jankúıerleri men sport salasynyń ókilderi qarsy aldy.
