Ashyq NQA-ǵa qujattar mazmuny nege tolyq salynbaıdy — Ádilet vıtse-mınıstri jaýaby

ASTANA. KAZINFORM — Ashyq normatıvtik-quqyqtyq aktiler portalynda qoǵamdyq talqylaýǵa shyǵarylatyn qujattardyń mazmuny nelikten tolyq júktelmeıdi? Bul saýalǵa Ádilet vıtse-mınıstri Laýra Mersalımova jaýap berdi.

— «Ashyq NQA» portalynda jasalǵan ózgerister eń aldymen oqyrmanǵa tanysý barysynda yńǵaıly bolýy úshin jasaldy. Endi olarǵa kóptegen betti nemese salystyrmaly kesteni qaraýdyń qajeti joq. Óıtkeni, ázirleýshi memlekettik organ qysqasha mazmunyn berýge mindetti. Onda joba nege baǵyttalǵany, onyń oń ne teris saldary kórsetiledi, — dedi vıtse-mınıstr Senattyń jalpy otyrysynan keıin BAQ ókilderiniń saýalyna oraı.

Onyń aıtýynsha, azamattar atalǵan aqparatpen tanysyp, qorytyndy shyǵarady jáne pikir qaldyrýǵa da múmkindigi bar.

— Bul rette qujattyń tolyq mátinimen tanysqysy keletin kez kelgen adam tıisti memlekettik organǵa júginýge, al olar normatıvtik-quqyqtyq aktiniń tolyq mátinin usynǵa mindetti, — dedi Laýra Mersalımova.

Aıta keteıik, búgin Senat otyrysynda depýtattar taqtatas munaıy men ýran óndirýge qatysty jáne ákimshilik ádilet ınstıtýtyn jetildirýge múmkindik beretin Zańdardy maquldady.