Ashyq qudyqtar balalardyń ómirine qaýip tóndiredi — depýtat
ASTANA. KAZINFORM — Quryltaı otyrysynda depýtat Nursadyq Ergeshbek Premer-mınıstrdiń orynbasary Qanat Bozymbaevqa ınjenerlik jelilerdiń qaýipsizdigin qamtamasyz etý sharalary boıynsha depýtattyq saýal joldady.
Onyń sózinshe, el azamattarynyń qaýipsizdigine qater tóndirgen ashyq qudyqtar máselesi shuǵyl ári júıeli sheshimdi qajet etedi. Bul — kommýnaldyq ınfraqurylym men jaýapty organdardyń jumysyndaǵy ózekti másele.
— BAQ monıtorınginiń málimetteri boıynsha, tek 2026 jyly balalardyń ashyq qudyqtarǵa qulaýynyń jeti jaǵdaıy tirkelgen. Bul másele júıeli sıpatqa ıe bolýda. Іshki ister mınıstrliginiń málimeti boıynsha, anyqtalǵan ashyq lıýkter sany 2021 jyly 126-dan, 2025 jyly 356-ǵa deıin ósti, al 2026 jyldyń toǵyz aıynda taǵy 276 ákimshilik is tirkelgen, — dedi depýtat.
Sonymen qatar, elde áli kúnge deıin barlyq ınjenerlik qudyqtyń biryńǵaı tsıfrlyq esebi joq ekenin atap ótti. Olardy qaýipsiz deńgeıde ustaýǵa jaýaptylar árdaıym anyqtala bermeıdi. Al ıesiz obektilerdiń metall qaqpaqtardyń urlaý qaraý nıetti kisilerge ońaıǵa soǵady.
— Qoldanystaǵy Abattandyrýdyń úlgilik qaǵıdalary boıynsha qaqpaq urlansa, qaýipti aımaq bir saǵat ishinde qorshalyp, jańa qaqpaq bes saǵat ishinde jabylýy kerek. Degenmen, naqty esep berý, qaýipti jedel anyqtaý jáne oryndaý bolmasa, mundaı qaǵaz júzindegi ereje paıda bermeıdi, — dedi Nursadyq Ergeshbek .
Ol máseleni sheshýdiń naqty joldaryn usyndy:
· Biryńǵaı jaýapkershilik erejelerin belgileý jáne menshik ıesi týraly aqparaty bar qudyqtardyń tsıfrlyq tizilimin jasaý;
· Qaýipti dereý joıý úshin qaraýsyz qalǵan qudyqtardy mamandandyrylǵan uıymdarǵa berý;
· Bir saǵat ishinde qaýipti aımaqtardy qorshaý, eki saǵat ishinde balalar mekemelerindegi qaqpaqtardy aýystyrý jáne qaqpaqtardyń jetkilikti qoryn saqtaý;
· Táýekeli joǵary qudyqtardy torlarmen jáne datchıktermen jabdyqtaý arqyly arnaıy sanatqa bólý;
· Kompozıttik qaqpaqtarǵa qoıylatyn talaptardy ázirleý jáne urlyq aımaqtaryndaǵy metall qaqpaqtardy olarmen aýystyrý;
· Urlanǵan qaqpaqtardy tapsyrý áreketteri kezinde metall synyqtaryn qabyldaý boıynsha baqylaýdy kúsheıtý jáne polıtsııaǵa jedel habarlaý;
· Ýákiletti organdar men óńirler úshin biryńǵaı júıede derekter almasýdy qamtamasyz ete otyryp, jaraqattardyń, urlyqtardyń jáne olardy sheshý merzimderiniń biryńǵaı esebin engizý.
Odan bólek, depýtat qaýipti aımaqtardy anyqtaý jáne syn-qater kartalaryn jasaý boıynsha pılottyq jobalardy iske qosý arqyly búkil el boıynsha «Qaýipsiz qudyq» naýqanyn uıymdastyrýdy usyndy.
Aıta keteıik, buǵan deıin Shymkentte qudyq ishinde eki jumysshy ýlanyp, kóz jumǵanyn jazǵanbyz.
