«Ashyq esik» kúni: elimizdegi áskerı bólimderge 4000-nan astam adam keldi
ASTANA. KAZINFORM — Qarýly kúshterdegi «Ashyq esik» kúni aıasynda sarbazdardyń 4000-nan astam týǵan-týysy áskerı bólimderge jınaldy. Bul týraly Qorǵanys mınıstrliginiń baspasóz qyzmeti jarııalady.
Qonaqtarǵa qarý-jaraq pen áskerı tehnıka kórmeleri uıymdastyryldy. Ata-analar uldarynyń qyzmet barysynda neni meńgergenin kórdi. Sap jáne oqý-jattyǵý alańdarynda sarbazdar qarýmen saptyq tásilderdi, qoıan-qoltyq urys elementterin jáne oqý-jaýyngerlik tapsyrmalardy oryndaý sheberligin kórsetti.
Kelýshilerge tárbıe jumysyn uıymdastyrý jáne áskerı tártipti saqtaý boıynsha qorǵanys vedomstvosy tarapynan qabyldanyp jatqan sharalar týraly jan-jaqty aqparat berildi. Sonymen qatar qarýdy qoldaný, sabaqtar men jattyǵýlar ótkizý kezindegi qaýipsizdik qalaı qamtamasyz etiletini egjeı-tegjeıli túsindirildi.
Qorǵanys vedomstvosynyń bul bastamasy merzimdi áskerı qyzmetshilerdiń týǵan-týystaryna jaýyngerlik daıyndyqtyń uıymdastyrylýymen, qyzmet jáne turmys jaǵdaılarymen tanysýǵa múmkindik berdi. Qonaqtar kazarmalardy aralap, jatyn bólmeler men turmystyq aımaqtardy kórdi.
Elordadaǵy brıgadaǵa Qaraǵandy, Shymkent, Qyzylorda, Qostanaı jáne Astana qalalarynan barlyǵy 170-ten astam ata-ana jınaldy. Olar tırdi, sport zalyn, kitaphanany aralap, jaýyngerler jattyǵatyn taktıkalyq alańda boldy.
Qatardaǵy jaýynger Dıas Bazkenovtiń ákesi Ashat pen onyń týǵan aǵasy Sábıt Bazkenov Qaraǵandy qalasynan arnaıy kelgen. Jaýyngerlik jarystyń jeńimpazy atanǵan Dıas Bazkenovtiń sýreti bólimsheniń qurmet taqtasyna ilingen.
Sábıt Bazkenovtiń ózi kezinde Tájik-Aýǵan shekarasynda áskerı boryshyn ótegen. Ol qazirgi áskerdiń jaǵdaıyn kórip, erekshe áser alǵanyn aıtty.
— Men ózim Tájik-Aýǵan shekarasynda qyzmet atqardym. Ol kezdiń qıyndyǵy az bolǵan joq. Búgingi jastardyń áskerı boryshyn abyroımen ótep júrgenin kórip, kóńilim marqaıdy. Dıas sııaqty tártipti, namysty uldar eldiń qorǵany bolary sózsiz. Jastarǵa aıtarym — Otan aldyndaǵy boryshty adal atqaryp, áskerı tártipke árdaıym berik bolsyn, — dedi ol.
Al Aqtaý garnızonynyń áskerı bólimderi 400-den astam qonaqty qabyldady. Áskerı-teńiz kúshteriniń ártekti kemeler dıvızıonynda ata-analar teńiz qyzmetiniń atmosferasyna qanyqty. Olar matrostardyń turmysymen tanysyp, kaıýt-kompanııalar men kambýzdy aralady.
Desanttyq-shabýyldaý áskerleriniń bólimsheleri de 400-den astam qonaqty qarsy aldy. 37-desanttyq-shabýyldaý brıgadasynda qonaqtarǵa parashıýtti qalaı kııý kerektigi kórsetilip, arnaıy keshende áýe-desanttyq daıyndyq elementteri tanystyryldy.
Іs-sharaǵa qatysa almaǵan ata-analar men jaqyndary úshin áskerı bólimderdiń basshylyǵy «Otbasymen beıneqońyraý» arqyly baılanys uıymdastyrdy.
Biryńǵaı «Ashyq esik» kúni ata-analarǵa uldarynyń kásibı komandırlerdiń basshylyǵymen qyzmet atqaryp, jan-jaqty qoldaýǵa ıe bolyp otyrǵanyna kóz jetkizýge múmkindik berdi. Bul shara armııa týraly qalyptasqan stereotıpterdi eńserýge, sondaı-aq sarbazdarǵa degen qamqorlyqtyń Qarýly kúshter úshin sózsiz basymdyq ekenin nyǵaıta túsýge baǵyttalǵan mańyzdy qadam boldy.
Buǵan deıin qazaqstandyq stýdentter áskerı kafedraǵa túsý úshin ótinishti onlaın tapsyra alatyny týraly jazdyq.