«Ashyq aspan» rejımi Atyraý halyqaralyq áýejaıyna ne beredi

ATYRAÝ. KAZINFORM – H.Dospanova atyndaǵy Atyraý halyqaralyq áýejaıy aldaǵy ýaqytta «Ashyq aspan» rejımine qosylady. Atyraý oblysy ákiminiń orynbasary Qaırat Nurtaevtyń aıtýynsha, Úkimettiń qoldaýymen atalǵan rejımdi qosý máselesi oń sheshimin tapqan.

Ákim orynbasarynyń pikirinshe, mundaı rejımniń áýejaı jumysyna tıgizetin birneshe sebebi bar.

– Birinshiden, halyqaralyq jáne ishki reıster sany kóbeıedi. Ekinshiden, Batys Eýropa men Taıaý Shyǵystaǵy, Azııa qurlyǵyndaǵy elderge tikeleı áýe baılanysyn ashýǵa yqpal etedi. Úshinshiden, áýe kompanııalarynyń arasyndaǵy básekelestikti arttyrady. Tórtinshiden, áýe bıletiniń baǵasyn tómendetýge múmkindigi týyndaıdy. Besinshiden, júk tasymalyn damytýǵa, sheteldik ınvestıtsııany kóbirek tartýǵa jol ashylady, - deıdi Qaırat Nurtaev.

Onyń málimetinshe, bıyl jańa áýejaı kesheniniń qurylysy bastalady. Investıtsııalyq joba aıasynda salynatyn jańa aerovokzal kesheniniń aýdany – 16 myń 500 sharshy metr.

– Byltyr ınvestormen memorandýmǵa qol qoıyldy. Sheteldik kompanııa nysandy 3 jańa teleskopııalyq trappen jabdyqtaıdy. Ushý-qoný jolaǵy keńeıtiledi. Bıyl bastalatyn áýejaı vokzalynyń qurylysyn aldaǵy jyly tolyq aıaqtaý josparlanyp otyr. Sol kezde jańa áýejaı logıstıkalyq ortalyq retinde damyp, Atyraý munaı-gaz ónerkásibi úshin mańyzdy habqa aınalady. Atyraý oblysy ákimdigi men QazAir Investments LLC arasyndaǵy memorandýmǵa sáıkes áýejaıdy ınvestorǵa senimgerlik basqarýǵa berý baǵytynda jumys atqarylyp jatyr, - dep málim etti Qaırat Nurtaev.

Qazir H.Dospanova atyndaǵy Atyraý halyqaralyq áýejaıynan aptasyna 7 baǵytpen ishki 89 áýe reısi ushady. Al halyqaralyq 6 baǵytta aptasyna 21 reıs oryndalady. Qoldanystaǵy áýejaıda jylyna 1,2-1,3 mln jolaýshyǵa qyzmet kórsetiledi. Jańa termınal iske qosylǵannan keıin jolaýshylar sany 6 mln-ǵa deıin kóbeıedi.

Eske sala ketelik, buǵan deıin Atyraýǵa soltústik aınalma joldyń qurylysy ne úshin qajettigin jazǵan edik.