Ashyq aspan astyndaǵy mýzeı, gala-kontsert, otshashý: Baıqońyrdyń 70 jyldyǵy qalaı toılandy
QYZYLORDA. KAZINFORM — Búgin Qyzylorda oblysynda «Baıqońyr» ǵarysh aılaǵy men qalasynyń 70 jyldyǵy keń kólemde toılanyp jatyr. Bul týraly Qazaqstan Respýblıkasy Prezıdentiniń Baıqońyr keshenindegi ókildigi habarlady.
Mereıtoı juldyzdy qalashyqta ornalasqan G. Shýbnıkov atyndaǵy saıabaqtaǵy «Qala men Baıqońyr ǵarysh aılaǵyna 65 jyl» eskertkishinde ótken mıtıngiden bastaldy. Saltanatty is-sharada Qazaqstan Respýblıkasy Prezıdentiniń Baıqońyr keshenindegi arnaýly ókili Q.Nurtaı, «Roskosmos» MK bas dırektory D. Bakanov jáne Baıqońyr qalasy ákimshiliginiń basshysy K. Býsygın sóz sóıledi. Olar Baıqońyrdyń negizin qalaǵan ardagerlerge alǵys bildirip, eki el úshin ǵarysh aılaǵynyń mańyzdylyǵyn atap ótti.
Odan keıin qala turǵyndary men qonaqtary ashyq aspan astynda mýzeıdiń resmı ashylý rásimine kýá boldy.
- Mýzeı «Baıqońyr» ǵarysh aılaǵynyń baı murasyn, tehnıkalyq jetistikterin jáne damý tarıhyn pash etedi. Munda ǵaryshtyq tehnıka úlgileri, zymyrandar, jerústi jabdyqtar men tarıhı nysandar qoıylǵan. Bul – kelýshilerge otandyq jáne álemdik ǵarysh tarıhyn kórneki túrde usynatyn biregeı oryn, - delingen habarlamada.
Merekelik is-sharalar tús aýa qaladaǵy «Satýrn» mádenıet jáne kıno zalynda jalǵasty. Onda Qazaqstan men Reseı basshylarynyń beınequttyqtaýy kórsetildi.
Sonymen qatar Qazaqstan Respýblıkasy Prezıdentiniń Baıqońyr keshenindegi arnaýly ókili Q. Nurtaı, QR TsDIAÓM Aeroǵarysh komıtetiniń tóraǵasy B. Oralmaǵambetov, «Roskosmos» bas dırektory D. Bakanov jáne Baıqońyr qalasy ákimshiliginiń basshysy K. Býsygın jınalǵandardy quttyqtap, arnaıy marapattar tabys etti.
Baıqońyr kesheninde uzaq jyl eńbek etken azamattarǵa «Qyzylorda oblysynyń áleýmettik-ekonomıkalyq damýyna qosqan úlesi úshin», «Ǵarysh salasyn damytýǵa qosqan úlesi úshin» vedomstvolyq medaldary tabys etildi.
Resmı jıyn ónerpazdardyń kontsertine ulasty.
Merekelik is-sharalar qalalyq stadıonda qorytyndylanady. Oǵan QR Premer-Mınıstriniń birinshi orynbasary R. Sklıar qatysady dep josparlanyp otyr. Osy keshte ǵarysh salasynda uzaq jyl eńbek etken ozattarǵa memlekettik nagradalar, qoǵamdyq-saıası jáne áleýmettik-ekonomıkalyq salada eren eńbek sińirgen 16 adamǵa «Baıqońyr qalasynyń Qurmetti azamaty» ataǵy tabystalmaq.
Odan keıin otandyq estrada juldyzdary óner kórsetip, saltanatty otshashý bolady.
Aıta keteıik, búgin «Baıqońyr» ǵarysh aılaǵynyń qurylǵanyna 70 jyl toldy.
Osyǵan oraı, Memleket basshysy Qasym-Jomart Toqaev vıdeo úndeý joldady.
70 jylda Baıqońyrdan ǵaryshqa 150-den astam adam attandy.