Aşy shyndyq bárine birdeı unaı bermeıdi - Prezıdent

BÝRABAI. KAZINFORM – Elimiz eshqashan popýlızmge, menmendikke jáne jalǵan uranǵa jol bergen joq. Bul týraly Ulttyq quryltaıdyń IV otyrysynda Memleket basshysy Qasym-Jomart Toqaev aıtty.

- Memleket aýyl eńbekkerlerin qoldaýdy barynsha kúsheıtti. Byltyr kúzde 27 mıllıon tonna astyq jınap, rekordtyq kórsetkishke qol jetkizdik. Kásipkerlikti damytýǵa árdaıym basa nazar aýdarylady. Turǵyn úı qurylysynyń qarqyny edáýir ósip, byltyr 19 mıllıon sharshy metr baspana paıdalanýǵa berildi. Bul da – buryn-sońdy bolmaǵan jetistik. 2019 jyldan beri elimizde 250-den astam jataqhana salyndy. Sonyń nátıjesinde oryn tapshylyǵy 6 ese qysqardy. Stýdentter sany udaıy kóbeıip, joǵary oqý oryndarynda 624 myń azamat bilim alyp jatqanyna qaramastan, osyǵan qol jetkize aldyq. Elimizdiń 90 myńnan astam azamaty shetelde oqıdy. Bul bizdiń qoǵamnyń ashyqtyǵyn kórsetedi. Azamattarymyz demalý úshin shetelge jıi shyǵatyn boldy. Bizdiń kók tólqujatymyz álemdegi 92 memlekettiń aýmaǵyna vızasyz emin-erkin kirýge múmkindik beredi, - dedi Prezıdent.

Memleket basshysynyń atap ótýinshe, Qazaqstan – halyqaralyq arenada zor qurmetke ıe memleket, elimizdi «orta derjava» dep ataıtyn boldy. Birikken Ulttar Uıymynyń Bas Assambleıasy Almatyda Ortalyq Azııa men Aýǵanstan úshin Ornyqty damý maqsattary jónindegi Birikken Ulttar Uıymynyń aımaqtyq ortalyǵyn ashý týraly qarar qabyldady. Osy sheshim elimizdiń álemdegi yqpaly men bedeli zor ekenin ańǵartady.

- Bul derekter bárimiz bir el bolyp atqarǵan jumystyń bir parasyn ǵana kórsetedi. Biz barlyq syn-qaterdi senimdi túrde eńserýdi jáne máseleniń bárin baıyppen, iskerlikpen sheshýdi úırendik. Eshqashan popýlızmge, menmendikke jáne jalǵan uranǵa jol bergen joqpyz. Árdaıym ádil dıalog ornatýǵa umtyldyq, qıyndyqtar pen qaýip-qaterlerdi jasyrmaı, týrasyn aıttyq. Naqty ahýaldy boıamasyz kórsettik, bos ýáde de bergen joqpyz. Aşy shyndyq bárine birdeı unaı bermeıdi. Biraq mundaı qadam jaǵdaıǵa týra qarap, jalǵan úmitke aldanbaý úshin kerek. Ádemi sóılep, ýádeni úıip-tókkender emes, maqsat jolynda úzdiksiz alǵa umtylyp, jurtqa jaǵa bermese de, asa mańyzdy sheshim qabyldaı biletinder tabysqa jetedi. «Eńbek joly muratqa jetkizedi». Bul – biz atqaryp jatqan jumystyń basty qaǵıdasy, - dedi Qasym-Jomart Toqaev.

Buǵan deıin Memleket basshysy álemdegi eski tártip kúırep jatqanyn, al jańa dáýirdiń sulbasy áli naqty aıqyndalmaǵanyn aıtqan edi.