Ashhabadta Túrkimenstan-Aýǵanstan-Pákistan-Úndistan transulttyq gaz qubyryn salý jobasy talqylandy
ASTANA. QazAqparat - Túrkimenstan prezıdenti Ǵurbanǵuly Berdimuhamedov Aýǵanstan Islam Respýblıkasynyń taý-ken qorlary men munaı mınıstri Daýdshah Saba bastaǵan Aýǵanstan úkimetiniń delegatsııasyn qabyldady, dep habarlady turkmenistan.ru.
Kezdesý barysynda taraptar otyn-energetıkalyq salasyndaǵy seriktestikti damytý jáne Túrkimenstan-Aýǵanstan-Pákistan-Úndistan (TAPÚ) transulttyq gaz qubyryn salý jobasyn iske asyrý máselelerin talqylady.
Túrkimenstan prezıdentiniń atap ótýinshe, taraptar Aýǵanstanda turaqty ekonomıkalyq jáne áleýmettik jandaný, eldiń aımaqtyq jáne álemdik sharýashylyq qatynastaryna tabysty qosylý úshin mańyzdy shart retindegi TAPÚ gaz qubyry jobasynyń iske asyrylýyna erekshe mán berip otyr.
Sondaı-aq, kelissózder barysynda taraptar saýda-ekonomıkalyq seriktestik, ekonomıkalyq, qarjylyq jáne agroónerkásip salalaryndaǵy yntymaqtastyqtyń oń jaǵdaılaryn jasaý máselelerin ortaǵa saldy.
