Ashhabad-Almaty baǵyty boıynsha ushaq aptasyna úsh ret ushatyn boldy
ASTANA. QazAqparat - Jolaýshylarǵa yńǵaıly bolý úshin QR IDM Azamattyq avıatsııa komıteti halyqaralyq baǵyttaǵy reısterdiń jıiligin arttyrý boıynsha jumystardy júrgizýde, dep habarlaıdy QazAqparat tilshisi atalmysh mınıstrliktiń Feısbýk paraqshasyna silteme jasap.
«2018 jylǵy 19 qyrkúıekten bastap kóktemgi-jazǵy navıgatsııanyń aıaqtalýyna deıin (2018 jylǵy 27 qazan) «Túrikmenstan» áýe kompanııasy Ashhabad-Almaty-Ashhabad baǵyty boıynsha aptasyna 2-den 3-ke deıin reıster sanyn kóbeıtedi. Bul osy baǵytta elder arasyndaǵy áýe tasymalyna degen suranystyń artýymen baılanysty bolmaq», - delingen habarlamada.
Reıster dúısenbi, beısenbi jáne senbi kúnderi Boeing-737 tıpti áýe kemesimen oryndalady.
Aıta keterligi, buǵan deıin Ulybrıtanııaǵa, Birikken Arab Ámirlikterine, Reseıge, Grýzııaǵa, Ózbekstanǵa jáne taǵy basqa da elderge reıster sany artqan bolatyn.
