Ashhabad-2017: Mýaı-taıdan Qazaqstan quramasy 7 medal enshiledi

ASTANA. QazAqparat - Ashhabad qalasynda ótip jatqan jaýyngerlik óner túrleri boıynsha jabyq ǵımarattaǵy V Azııa oıyndarynda mýaı-taıdan jarystar óz máresine jetti, dep habarlaıdy QazAqparat tilshisi.

Fınaldyq beldesýge deıin súrinbeı jetken qazaqstandyq 4 sportshy, aqtyq synda qarsylastaryna jol berip, el qorjynyn 4 kúmis medalmen tolyqtyrdy.

Aqtyq básekede 57 kg salmaqtaǵy Elaman Saıasatov taılandtyq Arnon Ponkrathokke 28:29 esebimen ese jiberse, Ábil Galıev (63,5kg) pen taılandtyq Rýtaıfan Sapmane arasyndaǵy jekpe-jek taı sportshysynyń paıdasyna 27:30 esebimen aıaqtaldy.

Baıraqty dodada el namysyn qorǵap jatqan ózge otandastarymyz - Vadım Oparev (75 kg) pen Emıl Ýmaev (81 kg) ırandyq sportshylardan jeńilis tapty.

Buǵan deıin habarlaǵanymyzdaı, atalmysh sport túrinen Namıka Neftalıeva (71kg), Erqanat Ospan (60 kg) jáne Almaz Sársenbekov (57 kg) jartylaı fınalǵa jetip, qola medal ıegeri atanǵan bolatyn.