Áshekeıler, jer aýmaqtary, valıýta – Memleketke qaıtarylǵan aktıvter qaıda jumsalady

ASTANA. QazAqparat – Aktıvterdi qaıtarý boıynsha vedomstvoaralyq komıssııanyń resmı ókili Zeıin Álipbek qaıtarylǵan aktıvterdiń qaıda jumsalatynyn aıtyp berdi, dep habarlaıdy QazAqparat tilshisi.

«Komıssııa jumysynyń nátıjesinde búgingi kúnge deıin 760 mlrd teńge qaıtaryldy. Bul komıssııa jumysqa kirisken 7-8 aıdyń nátıjesi jáne bul sandardyń kóbeıetini sózsiz. Atalǵan soma dúnıe-múlik túrinde, aktıv túrinde jáne valıýta túrinde qaıtarylyp jatyr. Bul aktıvter Lıhtenshteın, Aýstrııa, Birikken Arab Ámirlikterinen kelýde», - dedi Zeıin Álipbek Bas prokýratýra kýlýarynda tilshilerge bergen suhbatynda.

Onyń aıtýynsha, Qaırat Satybaldyulyna baılanysty ondaǵan mıllıon dollardyń áshekeı zattary qaıtaryldy, 360 mlrd teńge memleketke kelgen tikeleı zalal óteldi.

Sondaı-aq, qylmystyq isterdiń fıgýranttary 172 mlrd teńgeni óz erkimen memleketke qaıtaryp bergen.

«Qaıtarylǵan aktıvter elimizdiń ár salasyna jiberiledi. Mysaly salyqtan jaltarýlar bolsa, bizdiń komıssııa 100 mlrd teńgeniń salyǵyn qaıtardy, ol salyq organdarynyń óz shotyna túsedi. Oǵan qosa zańsyz alynǵan, óz maqsatyna paıdalanylmaǵan 460 myń gektar jer qaıtaryldy. Bul da ár aýyldyń, ár aýmaqtyń menshigine qaıtarylady. Tárkilengen basqa da múlikterdi qaıda jiberý keregi talqylanyp jatyr», - dedi Z. Álipbek.

Aıta keteıik, Bas prokýratýrada Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııanyń kezekti otyrysy ótti. Tutastaı alǵanda, memleketke ortaq kúsh-jigermen 760 mlrd teńgeden astam somaǵa aktıvter qaıtaryldy, onyń ishinde sheteldik ıýrısdıktsııalardan 575 mln dollar kelgen.