Ashat Jitkeev endi Qazaqstan dzıýdo federatsııasynyń vıtse-prezıdenti qyzmetin atqarady

ASTANA. KAZINFORM - Bul sheshim federatsııanyń Astanada ótken kezekti konferentsııasynda qabyldandy.

Ashat Rasýluly Jitkeev 2008 jyly Beıjiń Olımpıadasynyń kúmis júldesin enshiledi. Sondaı-aq Azııa chempıony, oǵan deıin álem chempıonatynyń qola júldegeri atandy. 

2011–2012 jyldary erler ulttyq quramasynyń bas bapkeri qyzmetin atqardy. 2012-2021 jyldarda federatsııanyń damý jónindegi dırektory, bas hatshysy bolsa, 2021-2022 jyldary federatsııa prezıdentiniń mindetin atqardy. Al 2023 jyldan bastap qaıtadan bas hatshy laýazymynda eńbek etti. 

Sońǵy eki jyldan beri Ashat Jitkeev Azııa dzıýdo odaǵynyń referı-dırektory retinde halyqaralyq deńgeıde qyzmetin jalǵastyryp keledi.

Qazaqstan dzıýdo federatsııasynyń bas hatshysy qyzmetin endi halyqaralyq dárejedegi sport sheberi, 2012 jylǵy London Olımpıadasynyń qatysýshysy, birneshe dúrkin el chempıony Tımýr Bolat taǵaıyndaldy. Tájirıbeli maman 2017 jyldan beri Qazaqstan ulttyq quramasynyń komanda jetekshisi qyzmetin atqaryp keldi.

Konferentsııa barysynda óńirlerde dzıýdo sportyn órkendetýge qatysty naqty tapsyrmalar berildi. 2028 jyly Los-Andjeles Olımpıada oıyndarynda ulttyq quramanyń tabysty oıyn kórsetýine baǵyttalǵan jumys jalǵasady.

Eske salsaq, budan buryn Mońǵolııada ótip jatqan Grand Slam serııasyndaǵy halyqaralyq týrnırdiń alǵashqy kúninde Qazaqstan quramasy eshqandaı medal ala almady.