Ashat Jańbyrov: Álem chempıonatynda shákirtterim úmitti aqtady
ASTANA. KAZINFORM — Grek-rım kúresinen elimizdiń 17 jasqa deıingi jasóspirimder quramasynyń bas bapkeri Ashat Jańbyrovpen Kazinform tilshisi Grekııa astanasy Afıny qalasynda ótken álem chempıonatynyń nátıjesi jóninde oı bólisken edi.
— Álem chempıonatynda otandastarymyz bes júlde aldy. Kórsetkishke kóńilińiz tola ma?
— Árbir úlken doda aldynda aldymyzǵa meje qoıamyz. Bul sportshynyń baby qandaı ekenin kórsetedi. Ózimizdiń de jumysymyz qalaı júrip jatqanyn ańǵartady. Qandaı deńgeıde bolsyn, álem chempıonatynyń jóni bólek. Ol — sportshylardyń aldaǵy bıik belesterdi baǵyndyrýyna jasalǵan alǵashqy qadamy. Úmit kútken shákirtterimniń barlyǵy senimdi aqtady deýge bolady. Odan da joǵary kórsetkishke qol jetkizýge múmkindik bar edi. Jarys aldynda «altynǵa kóbirek qol jetkizemiz be» degen úmitimiz boldy. Dese de shákirtterim joǵary deńgeıde kúresti. Olardyń arasynan Jańajol Qýanyshbek (45 keli) álem chempıony ataǵyn jeńip aldy. Al Nurdáýlet Kumaruly (48 keli), Asqar Nurálı (55 keli) kúmis júldeger atansa, Marlen Meıirbekuly (71 keli) men Dosbol Shamıl (65 keli) qola medal ıesi boldy.
Sondyqtan quramanyń jetistigine tolyqtaı kóńilimiz tolady. Jasaǵan jumysymyz, etken eńbegimiz aqtaldy deýge negiz bar.
— Ulttyq quramany jasaqtaý barysynda qandaı talaptarǵa kóńil bólindi?
— Oǵan erekshe mán berdik. Aldymen el birinshiligi ótti. Onda jaqsy nátıjege qol jetkizgen balýandar Azııa chempıonatynda baq synady. Odan keıin shákirtterimniń qurlyqtyq dodadaǵy nátıjesin tarazyladyq. Eki salmaqta balýandardy aýystyrýǵa týra keldi. Nátıjesinde quramaǵa 51 jáne 71 kelide synǵa túsetin sportshylar jańadan keldi. Álem chempıonatynda qaı-qaısysy da ózin jaqsy qyrynan tanytýǵa tyrysty. Olardyń alatyn asýy áli alda dep oılaımyn.
— Dúnıejúzilik doda eshkimge ońaı soqpaıtyny anyq. Qazaqstandyq balýandardyń qarsylastary jóninde ne aıtar edińiz? Olar jóninde aldyn-ala málimet jınap, zertteý jasap kórdińizder me?
— Álem chempıonatyna dúnıejúziniń 44 kelinen sportshylar keldi. Osynyń ózi dúbirli dodanyń tartysty ótkenin aıǵaqtaıdy. Qazir grek-rım kúresinde barlyǵy joǵary deńgeıde damyp keledi. Olardyń eshbirin álsiz dep aıta almaısyń. Sondyqtan kez-kelgen balýannan laıyqty qarsylyqty kútýge týra keledi. Biz jalpy komandalyq esepte úshinshi orynǵa turaqtadyq. Bul jóninen ekinshi oryn Ózbekstanǵa buıyrsa, kósh basynda Iran balýandary tur. Osy kórsetkishtiń ózinen álemde qaı elde grek-rım kúresi qandaı deńgeıde damyp jatqanyn ańǵarý qıyn emes. Budan buryn 2019 jyly qazaqstandyq balýan álem chempıony ataǵyn jeńip alǵan edi. Sodan beri mundaı tabysqa eshkim qol jetkizip kórmegen eken. Byltyr enshimizge eki kúmis buıyrsa, odan buryn nebári eki qolaǵa qolymyz jetti. Bıyl 1 altyn, 2 kúmis, 2 qola aldyq.
— Dúbirli dodaǵa daıyndyq qalaı júrgizildi?
— Jyl basynan beri álem chempıonatyna daıyndyqqa basa nazar aýdaryldy. Shákirtterim qaı kezde de ózderiniń babynda bolýyna kóńil bóldi. Turaqty túrde jattyǵý jasap, aldaǵy jarystarǵa ázirligin pysyqtaı tústi. Sondyqtan da olar halyqaralyq básekelerde elimizdiń týyn joǵary kóterýge kúsh saldy. Jalpy, árbir tógilgen terdiń óteýi qaıtady emes pe? Úzdiksiz jasalǵan jattyǵý osylaısha óz jemisin berdi. Sondaı-aq balýandardy babynda ustaý úshin oqý-jattyǵý jıyndary turaqty túrde ótkizilip keledi. Oǵan qosa jalpy fızıkalyq daıyndyq máselesi eskerýsiz qalǵan joq. Osynyń nátıjesinde shákirtterim árbir jarysqa saqadaı saı bolýǵa tyrysty.
— Balýandardy alda qandaı jarystar kútip tur?
— Biz úshin eshqandaı demalys joq. Óıtkeni, árbir sáttiń baǵasy erekshe dep sanaımyz. Sportshy sál bosańsyp ketken jaǵdaıda eshqandaı nátıjege jete almaýy múmkin. Sondyqtan biz eshqashan ýaqytty bosqa ótkizbeýge tyrysamyz. Jasóspirimder quramasy keleshekte elimizdiń negizgi balýyndaryna aınalady. Osyǵan baılanysty daryndy, talantty, eńbekqor, shymyr, sheberligi shyńdalǵan órenderdi daıyndaý — bizdiń basty mindetimiz. Osyndaı maqsatpen bapkerler quramy tynbaı ter tógip kelemiz. Onyń jemisin de kórip otyrmyz. Alda bizdi kóptegen jarys kútip tur. Olardyń arasynda TMD elderiniń oıyndaryna daıyndyq qazirden bastalyp ketti. Atalǵan básekede de joǵary bıikten kórinýge tyrysamyz.
Jalpy, sport degenińiz qanshama ter tógýdi qajet etedi. Sol jolda sportshylar qanshama ýaqytyn sarp etedi. Bul — barlyǵyna qoıylatyn talap. Osyǵan oraı biz kásbiı mansabyn endi bastap kele jatqan balýandardyń babyna únemi kóńil bólemiz. Barlyq jarysqa saqadaı saı barýǵa nazar aýdaramyz.
— Qazir elimizdiń barlyq óńirinde grek-rım kúresinen kóńil bólinip otyr ma? Bul baǵytta aldyńǵy lekten kórinip júrgen qandaı aımaqtardy aıtar edińiz?
— Rasy kerek, budan burynǵy jyldary Astana, Almaty, Shymkent qalalary, Jetisý, Almaty oblystarynyń balýandary joǵary deńgeıde sheberlik kórsetip júrdi. Qazir Soltústik Qazaqstan, Qostanaı oblystary sportshylarynyń da nátıjesi joǵarylaı tústi. Mundaı serpilis ózge de óńirlerde baıqalyp otyr. Básekeniń joǵary bolýy balýandardyń sheberligin shyńdaýyna úlken áserin tıgizedi. Sondyqtan elimizdiń barlyq aımaǵynda grek-rım kúresiniń óz deńgeıinde damýyna zor senim bildiremiz.
— Áńgimeńizge raqmet.