Ashat Shaharov jastarmen «OPEN TALK» formatynda ashyq pikir almasty
AQTÓBE. KAZINFORM – Keleli kezdesýde Aqtóbe jastary oblys ákimine ózderin tolǵandyrǵan saýaldaryn qoıyp, usynystaryn jetkizip, óńirdi damytýǵa baǵyttalǵan tyń bastamalarymen bólisti.
Basqosý Halyqaralyq jastar kúnine oraı uıymdastyrylǵan «Jastar — jańa dáýirdiń kúshi» atty merekelik kesh jáne «Jastarmen birge» ulttyq jastar aktsııasy aıasynda ótti.
Ashyq dıalog alańyna óńirdiń belsendi jastary — volonterler, kásipkerler, sportshylar, stýdentter, mádenıet, bilim berý jáne IT salalarynyń ókilderi, jastar uıymdary men qoǵamdyq birlestikterdiń músheleri qatysty. Jastar óz jobalary men jetistikterin tanystyryp, Aqtóbe oblysynyń damýyna úles qosar usynystaryn ortaǵa saldy.
Basqosýdy ashqan Ashat Shaharov aqtóbelik jastardy Halyqaralyq jastar kúnimen quttyqtap, olardyń el men óńirdiń damýyna qosar úlesi zor ekenin atap ótti.
- Jastar oblysymyzdaǵy halyqtyń shamamen 30 paıyzy. Bul — úlken áleýet ári zor jaýapkershilik. Sizder bilim, kásipkerlik, sport, mádenıet, volonterlik jáne qoǵamdyq jumystar arqyly óńirdiń damýyna óz úlesterińizdi qosyp kelesizder. Memleket jastarǵa jańa múmkindikter usynyp, olardyń qoǵamdyq jáne saıası ómirge belsendi aralasýyna jaǵdaı jasap otyr. Quryltaı men máslıhattarda jastarǵa 30 paıyzdyq kvotanyń bekitilýi — sizderge degen senimniń naqty kórinisi.
Óńirde de jastardy qoldaý sharalaryn júıeli túrde júzege asyryp kelemiz. Bilim alýdan bastap jumyspen qamtýǵa, „AQTOBE JASTARY“ turǵyn úı baǵdarlamasynan jastardyń bastamalaryn qoldaýǵa deıingi baǵyttardyń barlyǵyna nazar aýdarylýda. Eń bastysy — osy múmkindikterdi qalaı paıdalanatyndaryńyzda. Jańa Konstıtýtsııa qoǵamda teń múmkindikter qaǵıdatyn ornyqtyrdy. Endigi kezek — Sizderde.
Qazirgi zaman — bilim men biliktiń dáýiri. Sondyqtan únemi izdenip, jańa tehnologııalardy meńgerińizder. Jaýapkershilikten qoryqpaı, tyń ıdeıalardy usynýǵa umtylyńyzdar. Bilimderińiz, kúsh-jigerlerińiz ben qabiletterińizdi týǵan ólkeniń damýyna baǵyttańyzdar. Aqtóbe oblysynyń bolashaǵy kóp jaǵdaıda sizderdiń bastamalaryńyz ben eńbekterińizge baılanysty ekenine senimdimin, — dedi óńir basshysy.
Kezdesý barysynda Ashat Shaharov oblysta júzege asyrylyp jatqan jastar jobalary men bastamalaryna da toqtaldy. Sonyń ishinde jastardyń ekologııalyq belsendiligine erekshe mán berildi. Jastar «Taza Qazaqstan» jalpyulttyq ekologııalyq aktsııasy men «Jasyl el» baǵdarlamasy aıasyndaǵy abattandyrý jáne kógaldandyrý jumystarynda belsendi.
Volonterlik qozǵalysty damytý da mańyzdy baǵyttardyń biri retinde atap ótildi. Jas eriktiler áleýmettik jáne qoǵamdyq jobalarǵa qatysyp, turǵyndarǵa kómek kórsetip, qoǵamǵa qoldaý kórsetýge baǵyttalǵan bastamalarǵa aralasýda.
Jastardyń zııatkerlik jáne shyǵarmashylyq áleýetin arttyrýǵa da basymdyq berilýde. «AQTOBE CAMP» jobasy aıasynda jastardyń bilimin jetildirýine, ózara tájirıbe almasýyna, jańa adamdarmen tanysyp, ıdeıalaryn júzege asyrýyna múmkindik jasalǵan. Joba túrli salaǵa qyzyǵýshylyq tanytatyn jastardy biriktirip, olardyń kásibı jáne shyǵarmashylyq qabiletterin damytýǵa yqpal etedi.
Kezdesýde kitap oqý mádenıeti de sóz boldy. Jastar oblys ákiminen jas býynǵa qandaı kitaptardy usynatynyn surady. Ashat Shaharov ózine áser etken shyǵarmalarymen bólisip, únemi izdený, bilimdi jetildirýd jáne dúnıetanymdy keńeıtýdiń mańyzyn alǵa tartty.
Dıalog jalǵasy retinde aımaq basshysy 100 jastyń árqaısysyna syılyq retinde qazaqstandyq avtorlardyń kitaptary tabystaldy. Ár kitapqa Ashat Shaharov jyly lebizin jazyp, jeke qoltańbasyn qaldyrǵan.
Bul syılyqtyń máni jastarǵa izgi tilek bildirýmen shektelmeı, kitap oqý mádenıetin qalyptastyrý, únemi izdenip, ózin-ózi damytý jáne otandyq ádebıetke qyzyǵýshylyqty arttyrýdyń mańyzyn aıqyndaı tústi.
Merekelik kesh barysynda túrli salada joǵary nátıjelerge qol jetkizgen bir top jas aqtóbelik marapattaldy. Olardyń qatarynda sport, mádenıet, bilim berý, medıtsına, áleýmettik sala, memlekettik qyzmet, IT jáne kásipkerlik salalarynyń ókilderi — jas aqyn Amanjol Islamǵalı, órt sóndirýshi-qutqarýshy Nurbergen Ótegen, toǵyzqumalaqtan sport sheberi Almas Tlegenov, feldsher Samal Abdramanova, polıtsııa qyzmetkeri Tanbaı Orynbasaruly, pedagog Janar Ámirǵalı, oqýshy Nurseıit Seıtqazıev, IT mamany Shynasyl Qoılybaı, áleýmettik qyzmetker Farhad Narotov, memlekettik qyzmetshi Kelis Turmaǵambetov jáne jas kásipker Álıhan Izımov bar
Kezdesý sońynda óńir basshysy jastarǵa jańa múmkindikterden qoryqpaı, bilim men biliktiligin únemi jetildirip, óz kúsh-jigeri men qabiletin týǵan ólkeniń damýyna baǵyttaýdy tiledi.
