Ashat Shaharov jańadan saılanǵan eki aýdan ákimine birqatar mindet júktedi
Aqtóbe oblysynyń ákimi Ashat Shaharov saılaý ótip, ákimi tańdalǵan Oıyl jáne Qobda aýdandaryna baryp, aktıvpen kezdesti. Saılaýda eń kóp daýys jınaǵan Asqar Qazybaev pen Іzgilik Tynymgereevke birqatar mindet júktedi, dep habarlaıdy Kazinform.
Eki aýdan bir-birine jaqyn ornalasqan. Halqy kóbine mal sharýashylyǵymen aınalysady. Oblys ákimi osy baǵyttaǵy jumysty jandandyryp, sý, gaz, jol máselelerin sheshýdi tapsyrdy.
– Memleket basshysy Qasym-Jomart Toqaevtyń tapsyrmasyn oryndaý maqsatynda oblysta Qobda, Oıyl jáne Yrǵyz aýdandarynyń ákimderin tikeleı saılaý ótti. Prezıdent halyqtyń tilegin tyńdaý qajettigin únemi atap ótedi. Oblystyq mańyzy bar qalalar men aýdandar ákimderin saılaý – eldegi saıası reformalar jalǵasy. Oıyl aýdanynyń turǵyndary daýys berýge belsendi qatysyp, óz tańdaýyn jasady, - dedi Ashat Shaharov.
Oblys ákimi aýdandyq mańyzy bar joldardyń sapasyn arttyrý, eldi mekenderdi gazdandyrý, baspana kezeginde turǵandardy turǵyn úımen qamtamasyz etý máselesin sheshýdi mindettedi. Sondaı-aq Aqtóbe oblysynyń ákimi Ashat Shaharov Qobda aýdanynyń jańa ákimi Іzgilik Tynymgereevtiń aldyna aýdannyń odan ári áleýmettik-ekonomıkalyq damýy boıynsha birqatar naqty mindet qoıdy.
