Ashat Shaharov shaqyrtýǵa qar ombylap barǵan feldsherlerdi marapattady

AQTÓBE. KAZINFORM – Aqtóbe oblysynyń ákimi hromtaýlyq feldsherler Baýyrjan Qudııarov, Saıa Rysbaı, Qaırat Tóleýge alǵysyn bildirdi.

Aqtóbe oblysynyń ákimi Samara-Shymkent tasjolyndaǵy jaǵdaıdy baǵamdaý úshin jolǵa shyǵyp, Hromtaý aýdanyna bardy. Qazirgi kezde munda bir baǵytta ǵana jeńil kóliktiń júrýine ruqsat etildi. Al júk kólikteri jol tolyq tazartylǵanda ǵana jiberiledi. Aýdanǵa saparynda Ashat Shaharov qyzmetine adaldyq tanytyp, áleýmettik jeli juldyzdaryna aınalǵan feldsherlerdi marapattady. Baýyrjan Qudııarov, Saıa Rysbaı, Qaırat Tóleýge alǵys hat tabystady. Adamdardyń ómirin saqtap qalýdy kózdegen mamandardyń eńbegi mindetti túrde elenetinin jetkizdi.

- Biz belgilengen jerge keshigip jatsaq, dıspetcherlerge dálel retinde beınejazba jazyp jiberemiz. Naýqasqa baryp, jumysqa qaıtyp kelsek, áleýmettik jelilerde álgi vıdeomyz tarap ketken, - deıdi feldsher Baýyrjan Qudııarov. 

Eske salsaq, Hromtaý aýdanynyń jedel járdem feldsherleri 7 aqpan kúni júregi syr bergen naýqasqa bardy. Olar jarty jolda kósheni qar basqanyn kórip, ári qaraı jaıaý júrýge májbúr boldy. Osy aralyqta ombylap, jyldam jetý qıyndaǵanyn kórsetý úshin aǵa feldsher Saıa Rysbaı vıdeoǵa túsirip, ony dálel retinde usyndy. Keıin bul vıdeo jeline tarap ketip, kópshilik qoldaýyna ıe boldy.