Ashat Shaharov órt sóndirý jumystarynyń kesh bastalǵanyn synǵa aldy
AQTÓBE. KAZINFORM - Aqtóbede qamystan bastalyp, baý-baqsha ujymdaryna taraǵan órtti sóndirý kesh bastalǵan. Ashat Shaharov qarashaǵa deıin barlyq qaýipti aýmaqty qarap shyǵýdy tapsyrdy.
Aqtóbe qalasyndaǵy órtten keıin tótenshe jaǵdaılar men jergilikti atqarýshy organ qyzmetkerleri jıyn ótkizdi. Onda habarlama túsken boıda shuǵyl qımyldaý máselesi qozǵaldy.
- Keshe qaýpi joǵary órt boldy. Jigitter bárin jaqsy uıymdastyryp, tótep berdi. Biraq kesh bastady. Sıgnal túsken kezde shuǵyl sheshim qabyldaý kerek. Ár aýylda ókilderińiz bar. Shynyn aıtqanda, tragedııanyń az-aq aldynda qaldy. Sondyqtan tehnıka, qajetti kúsh pen qarjyny uıymdastyrý sharasy shuǵyl qabyldanýy kerek. Qamys qýrap tur, 5-7 sekýndtyń ózi jetkilikti. Ózen boıy da qurǵap qalǵan. Órttiń úlken-kishisi joq. Sondyqtan habarlama túsken boıda bar kúshti jumyldyrý kerek. Qoldan shyǵaryp alsańdar, problema bolady. Aqtóbe qalasynyń ákimi, oblystyq TJD bastyǵy, oblystyq tabıǵı resýrstar jáne tabıǵatty paıdalanýdy retteý basqarmasy, kásipkerlik basqarmasy qarashaǵa deıin polıgon aınalasyn, ózen boıyndaǵy qamys pen qaýip tóndiretin aýmaqty baqylaýǵa alý kerek,- dedi Aqtóbe oblysynyń ákimi Ashat Shaharov.
Aqtóbe oblystyq tótenshe jaǵdaılar departamentiniń bastyǵy Qaharman Orazalınniń aıtýynsha, oblys aýmaǵynda órttiń qaýipti kezeńi áli de saqtalyp tur. Bıyl 84 dala alqabynyń órtenýi jáne 7 orman órti tirkelgen. Oblysta 14 erikti órt sóndirý qurylymy birlestigi jumys isteıdi. Olar 142 komanda jáne eki myńǵa jýyq adamnan turady. Erikti órt sóndirýshiler 200-den astam órt sóndirý motopompasy jáne 1500-den astam arnaıy órt sóndirgishtermen jabdyqtalǵan. Qaharman Orazalın tabıǵı órtterdiń taralý qaýpin azaıtý úshin erikti órt sóndirý qurylymyye belsendi túrde tartyp, aýdan ákimderi tarapynan tıisti baqylaýdy qamtamasyz etý qajettigin atap ótti.
Eske salsaq, sársenbi kúni Aqtóbede qamys órtenip, qatty jel saldarynan órt baý-baqsha ujymdaryna jaıyldy. Órt 3 saǵattan astam ýaqytta sónirildi. Sóndirý jumystaryna polıtsııa, áskerıler de jumyldyryldy.
