Ashat Shaharov mektepterdegi qaýipsizdik júıesiniń jumysyn tekserdi

AQTÓBE. KAZINFORM – Aqtóbe oblysynyń ákimi Ashat Shaharov, oblystyq PD bastyǵy Abaı Júsipov jáne oblystyq Bilim basqarmasynyń basshysy Jaıyq Sultan qaladaǵy úsh mektepke bardy. Olar qaýipsizdik sharalarynyń jaı-kúıin tekserip, aqtóbelikterdi tek resmı aqparatqa senýge shaqyrdy. 

Aqtóbe oblysy ákimi baspasóz qyzmetiniń habarlaýynsha, óńir basshysy Ashat Shaharov Aqtóbe qalasynyń birqatar mektebin aralap, oqýshylardyń ata-analarymen áńgimelesti. Aımaq basshysy №21, 27 jáne 32 mektepterde boldy.

- Úreılenýge sebep joq. Halyqtan tynyshtyqty saqtap, tek senimdi, resmı aqparat kózderine senýdi suraımyn. Bul habarlamalardyń jalǵan ekeni burynnan belgili. Degenmen, qaýip tóndirý týraly aıtylǵandyqtan, barlyq mektepte qajetti qaýipsizdik sharalary qabyldandy. Jaǵdaı – baqylaýda, - dedi Ashat Shaharov.

Sonymen birge baspasóz qyzmeti mundaı habarlama Reseıde de taraǵanyn atap ótti.

- Óńir basshysy halyqty sabyrly bolýǵa, tek senimdi jáne resmı aqparat kózderine senýge shaqyrdy. Áleýmettik jelilerde 26 qańtar kúni Aqtóbe mektepterine shabýyl jasaýǵa daıyndalyp jatqany týraly jalǵan aqparat jarııalanǵan. Dál osyndaı, birdeı saryndaǵy mátinder men fotosýretter bar habarlamalar Reseıdiń birqatar qalasynda taratylǵan, - dep habarlama taratty oblys ákiminiń baspasóz qyzmeti.

Eske salsaq, búgin tańerteń telegram kanalda belgisiz bireý Aqtóbeniń birneshe mektebine shabýyl jasaıtynyn málimdedi.