Ashat Shaharov Kórisý kúninde belgili kompozıtordyń shańyraǵyna bardy
AQTÓBE.KAZINFORM - Aqtóbe oblysynyń ákimi Ashat Shaharov Kórisý kúni – Amal merekesinde óńirdiń mádenıetine zor úles qosqan kompozıtor, dırıjer, QazKSR-nyń eńbek sińirgen mádenıet qyzmetkeri, 90 jasty alqymdaǵan ardaqty ustaz Qaıyrǵalı Qojanbaevtyń shańyraǵyna arnaıy baryp, sálem berdi.
Ulttyq dástúrge saı ótken kezdesýde aımaq basshysy aqsaqaldyń hal-jaǵdaıyn surap, merekemen quttyqtap, kóristi. Sonymen qatar onyń Aqtóbe oblysynyń mádenıet salasyna qosqan zor úlesin atap ótti.
– Kórisý kúni – halqymyzdyń ǵasyrlar boıy jalǵasyp kele jatqan ıgi dástúri. Bul kúni aǵaıyn-týys, el-jurt bir-birimen amandasyp, úlkenge qurmet kórsetip, aqsaqaldardyń batasyn alady. Osyndaı kúni Sizge arnaıy kelip, amandasý – biz úshin úlken mártebe. Bıyl Aqtóbe óńirinde qazaq mýzyka óneriniń kórnekti ókili, kompozıtor, ǵalym jáne dırıjer Ahmet Jubanovtyń 120 jyldyǵy keń kólemde atalyp ótip jatyr. Onyń shákirtteriniń biri – ózińizsiz, ustazyńyzdyń mýzykalyq dástúrin jalǵastyryp, óńir mádenıetiniń damýyna ólsheýsiz úles qostyńyz. Ahmet Jubanovqa arnalǵan mereıtoılyq apta aıasynda kontsertter, kórmeler, sheberlik sabaqtary men festıvalder uıymdastyrylyp, ulttyq mýzyka ónerindegi sabaqtastyq pen urpaqtar jalǵastyǵy aıqyn kórinis tabady dep senemin, – dedi oblys ákimi.
Qaıyrǵalı Qojanbaev 1938 jyly Atyraý oblysynyń Mahambet aýdanynda dúnıege kelgen. Eńbek jolyn mádenı-aǵartý ýchılışesinde oqytýshy bolyp bastap, keıin Aqtóbe oblystyq fılarmonııasynyń ult aspaptar ansamblin basqardy. 1971 jyly Aqtóbe mýzyka ýchılışesiniń (qazirgi Ahmet Jubanov atyndaǵy mýzykalyq kolledj) dırektory bolyp taǵaıyndaldy.
Ol – 70-ke jýyq mýzykalyq shyǵarmanyń avtory. 2003 jyly Ahmet Jubanov atyndaǵy qazaq ult aspaptar orkestriniń qurylýyna bastamashy bolyp, onyń kórkemdik jetekshisi jáne bas dırıjeri qyzmetin atqardy. 2007 jyly orkestr Magnıtogorsk qalasynda ótken halyqaralyq «Evropa – Azııa» festıval-konkýrsynda Gran-prı júldesin ıelendi.
Ónerdegi eńbegi úshin 1988 jyly «QazKSR-nyń eńbek sińirgen mádenıet qyzmetkeri» ataǵy berilip, 1996 jyly «Eren eńbegi úshin» medalimen marapattalǵan.
Kezdesý sońynda aqsaqal el amandyǵyn tilep, batasyn berdi.
