Ashat Sadyrbaı: Saılaýdyń zań aıasynda ótip jatqany qýantady

NUR-SULTAN. QazAqparat – Saılaýdyń zań aıasynda ótip jatqany kóńil qýantady. «Team Qazaqstan» jastar qozǵalysynyń lıderi Ashat Sadyrbaı búgin óziniń Facebook paraqshasyna elimizde ótip jatqan Parlament pen barlyq deńgeıdegi máslıhat depýtattarynyń saılaýyna qatysty osyndaı pikir bildirdi, dep habarlaıdy QazAqparat.

«Saılaýdy uıymdastyrýshylardyń jumysy da joǵary baǵalaýǵa turarlyq. Saılaý ýchaskelerinde zamattardyń qaýipsizdigine basa mán berilgen. Barlyǵy karantın talaptaryna saı jabdyqtalǵan. Kireberisten bastap dene qyzýyn ólshep, medıtsınalyq qolǵap úlestirip jatyr. Biraz tanysym tańǵy saǵat 8-den bastap, Facebook-ke sýretterin sala bastady. Men sál keshirek bardym. Sonyń ózinde jáshiktegi bıýlletender ortasynan asyp qalǵanyn baıqadym. Bári tynysh, birqalypty, shý týdyratyn quqyq buzýshylyqtar ańǵarylmady»,-dep jazdy ol.

Sondaı-aq onyń aıtýynsha, partııa men halyqaralyq jáne táýelsiz baıqaýshylar óz jumysyn atqaryp jatyr. Volonterler de júr. Halyq partııalardyń baǵdarlamalaryn oqyp óz tańdaýyn jasaýda.

Al saılaý ýchaskesine baryp qaıtqan Tarlan.kz portalynyń bas redaktory Nurǵalı Nurtaı saılaý protsesin telearnadan da baqylap otyrǵandyǵyn aıtady.

«Baıqaǵanym saılaý protsesi qoǵamdyq-saıası turaqtylyq aıasynda ótip jatyr. Saılaýdyń uıymdastyrylýy men daıyndyǵy joǵary deńgeıde ekeni baıqalady, sanıtarlyq talaptar qatań saqtalǵan. Halyqaralyq jáne táýelsiz baıqaýshylar emin-erkin jumys istep júr.

Shetelde júrgen otandastarymyz da dıplomatııalyq ókildikterdegi saılaý oryndarynda tańmen talasyp belsendi daýys bergenin baıqap otyrmyz. Plıýralızmge jol ashyq, degenmen saılaýda daýys berý joǵary jaýapkershilik. Bir ıdeıany, saıası kózqarasty, tulǵany synaý onymen qarama-qarsy nárselerdi qabyldaý degen sóz emes. Búgingi saılaý saıası jańarýdyń úlken qadamy».-dep jazdy ol Facebook paraqshasynda.