Ashat Orazbek qyzmetinen bosatyldy

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek laýazymynan bosatyldy. Bul týraly atalǵan vedomstvonyń resmı ókili málim etti.

- Ashat Orazbek ókilettik merziminiń aıaqtalýyna baılanysty vıtse-mınıstr laýazymynan bosatyldy, - dep habarlady resmı ókil.

Aıta ketsek, Ashat Orazbek Tsıfrlyq damý, ınnovatsııalar jáne aeroǵarysh ónerkásibi vıtse-mınıstriniń orynbasary qyzmetine 2019 jyly 6 sáýirde taǵaıyndaldy.

Ashat Orazbek 1976 jylǵy 13 sáýirde Qaraǵandy qalasynda dúnıege kelgen.

E.Bóketov atyndaǵy Qaraǵandy memlekettik ýnıversıtetin támamdaǵan. Eńbek jolyn 1995 jyly Bilim jáne ǵylym mınıstrliginiń Qoldanbaly matematıka ınstıtýtynda ınjener bolyp bastaǵan.

Ár jyldary Qazaqstan Prezıdenti Ákimshiliginiń Memlekettik qupııalardy qorǵaý jáne aqparattandyrý bóliminde sektor meńgerýshisi, «Ulttyq aqparattyq tehnologııalar» AQ, «Zerde» ulttyq ınfokommýnıkatsııalyq holdıng» AQ, «QazTransOıl» AQ, «Transtelekom» AQ sekildi mekemelerde basshylyq laýazymdardy atqarǵan. 2017 jylǵy aqpan aıynan bastap Qazaqstandaǵy blokcheın jáne krıptotehnologııalardy damytý qaýymdastyǵynyń vıtse-prezıdenti bolǵan.