Ashat Maemırov pen Asylhan Tólepov vaktsına aldy

Astanadaǵy Ábý-Dabı Plaza saýda ortalyǵynda koronavırýsqa qarsy vaktsınalaý jumystary úzdiksiz júrip jatyr. Búgin solardyń arasynda Mýzykalyq jas kórermen teatrynyń ujymy da bar. Óner salasynyń ókilderin teatr dırektory Ashat Maemırov bastap keldi.

«Búgin erekshe kún. Nur-Sultan qalasy ákimdiginiń mýzykalyq jas kórermen teatryndaǵy áriptesterimizben birge Ábý-Dabı Plaza kesheninde vaktsına aldyq. «Spýtnık V» degen vaktsınany alýdy durys dep uıǵardyq. Biz kórermendermen tikeleı jumys isteımiz, halyqtyń ortasynda júremiz. Sondyqtan ártisterge, óner adamdaryna mindetti túrde saqtaný kerek», - deıdi teatr basshysy.

Ol «Spýtnık V» vaktsınasynyń tıimdiligi týraly dostary men áriptesterinen estigenin aıtady. Sol aqparattyń shyndyǵyna is júzinde kóz jetkizgen teatr ókili qazaqstandyqtardy vaktsına alýǵa shaqyrdy.

«Qazir ǵana alyp shyqtym. Eshqandaı tándi aýyrtatyndaı áserin baıqaǵan joqpyn. Izraıl, AQSh, Ulybrıtanııa sııaqty órkenıetti elderdiń kóbi vaktsına alýda alǵa shyǵyp jatyr. Óz kezeginde men de otandastarymdy vaktsına alýǵa shaqyramyn. Ótken ǵasyrlardyń basynda da osyndaı indet taraǵan kezder bolǵan. Sonyń bárin adamzat ár túrli vaktsınalardy oılap taýyp, jeńip otyrǵan. Meniń uǵymymda pandemııa kezinde ultty, memleketti saqtaýdyń birden-bir joly – vaktsına alý. Ózim bir jyl buryn osy koronavırýspen qatty aýyryp jazylǵanmyn. Sondyqtan, bıyl ekinshi ret qaıtalanbaýy úshin ekpe saldyryp jatyrmyn», - dedi Ashat Maemırov.

Osy teatrdyń jetekshi akteri, tanymal kıno akteri Asylhan Tólepov te «Spýtnık V» vaktsınasyn tańdaǵanyn aıtty.

«Búgin men úshin rasymen erekshe kún. Óıtkeni men ózim tańdaý jasap, vaktsına alamyn degen sheshimge keldim. Densaýlyq kerek, kútiný kerek. Aınalamyzǵa da bizdiń qaýipsiz bolǵanymyz qajet. Árbir iske syn aıtpas buryn, birinshi ózińdi túzeý kerek qoı. Otbasy músheleriniń arasynda eń birinshi men bastap turmyn. Mamandardan keńes aldym, bárin túsindirdi. Jańa ekpe salǵan mamandar da vaktsınadan keıin úsh kún jýynbaý kerek degen sııaqty erejelerin aıtyp jatyr», - deıdi akter.

Asylhannyń oıynsha, vaktsına alý týraly sheshimdi árkim ózi qabyldaýy kerek. Óıtkeni aqparat neǵurlym kóp bolsa, onyń ótirik-shynyn eksheý de soǵyrlym qıyn.

«Ázirge vaktsınanyń eshqandaı keri áserin sezgen joqpyn. Endi ekinshi dozany kútý kerek. Bir jyl buryn dám sezbeı, koronavırýstyń belgilerin aǵzamnan baıqaǵan bolatynmyn. Vaktsına týraly aqparat kóp qoı. Túrli vıdeo kelip jatady. Onyń bárin kóretin ýaqyt ta joq. Bireýdiń sózine qarap sheshim qabyldaýǵa bolmaıdy dep oılaımyn. Sondyqtan ózime vaktsına alý kerek dep sheshtim. Óıtkeni densaýlyq kerek, ózimizdi de, jaqyndarymyzdy da kútý d osydan bastalady. Bolashaqty oılaý kerek. Sol úshin vaktsına aldym», dep tolyqtyrdy akter.

Osy teatrdyń taǵy bir akteri Ermahan Aımahan da vaktsına alǵan kezde eshqandaı aýyrsyný sezbegenin aıtady.

«Árkimge densaýlyq kerek. Sondyqtan óz erkimizben alǵyzyp jatyrmyz. Men de otbasymda vaktsına alǵan birinshi adammyn. Mende vaktsına alýym kerek degen oı boldy. Sol oıdy iske asyrdym. Kúmándanǵan sátter bolǵan emes. Bárimizge óz densaýlyǵymyz úshin vaktsına alý kerek dep oılaımyn», - deıdi Ermahan.

Almatydaǵy T.Júrgenov atyndaǵy óner akademııasynyń magıstranty, elordadaǵy mýzykalyq jas kórermen teatrynda rejıserdiń assıstenti retinde tájirıbe jınaqtap júrgen Mekan Jumabaev vaktsına aýl týraly kópten beri oılap júrse de, buǵan deıin ýaqyy bolmaǵanyn aıtady.

«Vaktsına alýǵa qashan ýaqyt shyǵar eken dep kútip júrgenime biraz boldy. Búgin sáti kelipti. Ujymdaǵy áriptesterimmen birge kelgenimiz de durys bolǵan sııaqty. Eshqandaı áser baıqaǵan joqpyn. Qalypty jaǵdaıdaǵydaı sezimdemin. Óıtkeni ishteı daıyn bolyp keldim. Memleket óz halqyna eshqashan jamandyq jasamaıtynyn bilemiz ǵoı. Mynandaı kúrdeli kezeńde tártipke baǵynýymyz kerek. Túrli vıdeolar shyǵypty dep estımin. Sonyń kóbi meni aınalyp ótken sııaqty. Soǵan qaraǵanda kóńilinde kúdigi bar adamdar sondaı aqparattardy ózderi izdep tabatyn sııaqty ǵoı. Ondaı shyqqan jeri belgisiz dúnıelerge asa mán bermeımin. Koronavırýspen ózi aýyrmasam da, jaqyndarym, tanystarym aýyrdy. Іshinde dúnıeden ótip ketkenderi de bar», - deıdi jas maman.