Ashat Aımaǵambetovtyń 4 óńirdegi mektep kitaphanasyna kóńili tolmaıdy

NUR-SULTAN. QazAqparat – Mektep kitaphanalaryna ásirese qazaq tilindegi ádebıetterdi satyp alý kerek. Bul jaıynda QR Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Bul máseleni 2 jyl boıy aıtyp kelemiz. Ózgeris bar... Balalardyń kitapqa qushtarlyǵyn oıatý, kitap oqýǵa baýlý jumysy negizinde óte joǵary deńgeıde ótkizilip jatyr. Mektepterdiń kitap qory da jańartylýda. Onyń ishinde ásirese, qazaq tilinde ádebıetter satyp alynyp, balalarǵa qoljetimdi bolýda. Óńirlerge barǵanda mindetti túrde kitaphanalarǵa kirip, osy máseleniń qalaı iske asyp jatqanyn baqylaımyn. Mysaly, Qostanaı oblysyna bardym, kórdim. Kóp jumys júrgizilgen. Shymkent qalasynda úlken jumys júrgizilgenin baıqadym. Almaty qalasynda da kitaphanalarda jaqsy ózgeris bar», - dedi Ashat Aımaǵambetov mınıstrliktiń apparat jınalysynda.

Osy rette mınıstr elordada, Túrkistan, Pavlodar, Almaty oblystarynda mektep kitahanalarynyń qoryn tolyqtyrý jumystary kóńil kónshitpeıtindigin basa aıtty.

«Sondyqtan osy jumysty durys uıymdastyryńyzdar. Bul meniń jeke baqylaýymda. Bul – Prezıdent tapsyrmasy. Bul - balalarǵa kerek joba. Balalarǵa yńǵaıly orta jasaý kerek. Qajeti ádebı týyndylardy satyp alý kerek. Biz balalarǵa qandaı týyndylar satyp alyp berýimiz kerek? Balalarǵa qyzyqty bolýy qajet. Al sizder kelesizder de, baıaǵy sotsrealızm týyndylaryn, eresekterge ǵana qyzyqty týyndylardy satyp alasyzdar. Balalarǵa qyzyqty kitaptar joqtyń qasy. Qazirgi ýaqytta zamanaýı, balalar oqyp júrgen týyndylar qaıda? Árıne, oblystardyń kópshiligi tıisti deńgeıde jumys istep jatyr. Biraq men atap ótken 4 óńirde kózim jetkenin aıtyp otyrmyn. Almaty, Shymket qalalarynda, Qostanaı oblysynda balalarǵa eń qyzyqty ádebıetter satyp alynǵan. Ásirese qazaq tilinde týyndylar satyp alý kerek. Ol qazaq tilinde degennen keıin tek qazaq avtorlary bolmaýy tıis. Dúnıejúzilik, álem ádebıetiniń týyndylaryn satyp alý mańyzdy», - dedi ol.