Ashat Aımaǵambetov JOO-lardyń basshylaryn synǵa aldy

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov mektep túleginiń kásiptik baǵdaryn aıqyndaý jumysyn elimizdegi JOO-lar durystap júrgizip otyrmaǵanyn málim etti, dep habarlaıdy QazAqparat tilshisi.

«JOO-lardyń basty mindetteriniń biri – mektep túleginiń kásiptik baǵdaryn aıqyndaý. Eshkim de sizderdiń aldaryńyzda (ýnıversıtet basshylaryna qarata) mundaı tapsyrmany qoımaýy da kerek. Sebebi bul - JOO basshysynyń árbiriniń aldynda turǵan eń negizgi mindetterdiń biri. Biraq kásiptik baǵdardy aıqyndaý jumysynyń jarnamaǵa aınalyp ketetini bar. ıAǵnı, jyldyń aqpan aıynda «oıana qalyp», áriptesterimiz mektepti aralaı ketse – biz ony kásiptik baǵdaryn aıqyndaý jumysy dep ataı almaımyz. Sebebi aqpan – óte kesh. Oqýshylar oǵan deıin-aq óz mamandyqtaryn tańdap qoıady», - dedi Ashat Aımaǵambetov onlaın rejımde ýnıversıtet basshylarymen ótkizgen onlaın rejımdegi jıynda.

Mınıstr osy sebepti ýnıversıtetter kásiptik baǵdardy aıqyndaý jumysy júıeli túrde júrgizilý kerektigin eskertti.

«Ol jumys joq degende 6-7 synyptan bastalýy tıis. Balalar sol kezden bastap sizderdiń JOO-laryńyzdy bilýi kerek. Oqýshy kezinde ol balalar sizderdiń baıqaýlaryńyz ben olımpıadalaryńyzǵa qatysýy kerek. Bul máselege búgingi kúnge deıin kóp kóńil aýdarylmaı otyr. Ekinshiden jalpy túsinik te joq. Áıtse de keıbir ulttyq jáne óńirdegi ýnıversıtetter bul jumysty júrgizip te jatyr. Bárinde birdeı jumys joq deýge kelmeıdi. Biraq bul baǵytta naqty qalyptasqan júıeli jumystyń joq ekenin biz ashyp aıtýymyz kerek», - dedi ol.

Ashat Aımaǵambetovtyń aıtýynsha mektepterdiń ár túlegi mamandyqty tańdaý kezinde naryqta oǵan suranys bar ma degen suraqtyń jaýabyn bilip alýy tıis.

«Ýnıversıtet tańdaý boıynsha kóp suraq bar. Bilim jáne ǵylym mınıstrligi «Atameken» palatasymen birge jasaǵan reıtıng bar. 2021 jyldan bastap sertıfıkattaý engizilip, ýnıversıtettiń bári memlekettik emes, óz dıplomyn beredi. Onyń artynda úlken maǵyna jatyr. Ýnıversıtetter men bilim baǵdarlamalaryn qalaı tańdaý kerek – bul máselelerge tıisti jaýap berilip otyrǵan joq. Balalar mamandyq tańdaý kezinde tıisti aqparatty taba almaı otyr. Ol aqparat bolmaǵannan keıin bala árıne mamandyqty durys tańdamaıdy. Birinshi kýrstan keıin qanshama bala basqa mamandyqqa aýysyp ketip jatyr. Jalpy naryqta qajettiligi joq mamandyqtar boıynsha aqsha tólep oqyp jatqandar qanshama. Sondyqtan bul jumysty júıeli túrde júrgizýimiz kerek», - dedi ol.

Foto: www.nege.kz